Ukrayna hökumətində həyata keçirilən dəyişikliyin əsas səbəblərindən biri prezident Volodimir Zelenskinin ABŞ-da yeni prezident administrasiyası ilə uğurla qarşılıqlı əlaqə qura bilən insanları rəhbər vəzifələrə gətirmək istəyidir.

Musavat.com xəbər verir ki, bunu Bloomberg yazıb.

Nəşrin müəllifləri xatırladırlar ki, məhz indi baş nazir postunu tutan Yuliya Svırıdenko yazda Ukraynanın təbii sərvətləri ilə bağlı ABŞ-la az-çox məqbul saziş bağlaya bilmişdi. Həftələrlə davam edən yorucu danışıqlardan sonra hər iki tərəf diplomatik uğur kimi görünən bir sənədlə ictimaiyyətə çıxa bildi.

Bloomberg-in məlumatlı mənbələri Zelenskinin ötən ildən baş nazir Denis Şmıqalı tabeliyində olan şəxslə əvəzləmək imkanını nəzərdən keçirməyə başladığını iddia edirlər.

Nəşrin müəllifləri Ukrayna hökumətində genişmiqyaslı dəyişikliklərin Ağ Evlə Ukrayna Prezidentinin Aparatı arasında münasibətlərdə nəzərəçarpacaq dərəcədə istiləşmə fonunda baş verdiyinə də diqqət çəkiblər: “Trampın dönüş nöqtəsinin nə qədər davam edəcəyi ilə bağlı qeyri-müəyyənlik şəraitində Ukrayna hökuməti daha əlverişli şəraitə uyğunlaşmaq üçün sürətlə addımlar atdı”.

Mənbələrin sözlərinə görə, Svırıdenko Zelenskinin baş nazir postuna nəzərdən keçirdiyi yeganə namizəd olub, çünki onun təkcə amerikalılarla diplomatik uğurlarından deyil, həm də İqtisadiyyat Nazirliyindəki ümumi işindən razı qalıb. Mənbə bildirib ki, bu nazirliyin rəhbərliyində o, xarici maliyyə cəlb etmək və Ukraynada iqtisadi artımı stimullaşdırmaq qabiliyyətini sübut edib.

Bloomberg-in məlumatına görə, Svırıdenkonun özündən başqa, danışıqlar qrupunun bəzi digər nümayəndələri də ABŞ-la danışıqlarda uğur qazandıqları üçün irəli çəkiliblər. Xüsusilə Taras Kaçka iqtisadiyyat nazirinin müavini vəzifəsindən baş nazirin Avropaya inteqrasiya üzrə müavini vəzifəsinə dəyişib.

Nəşr yazır ki, ədliyyə naziri Olha Stefanişina ABŞ-da səfir postunu həm də amerikalılarla eyni resurs sazişinin bağlanmasında oynadığı rola görə alıb.

"Amerika istiqaməti çox vacibdir və bizim ən azı üç əməkdaşlıq sahəsi var - resurs fondu, ticarət sazişi və silah müqaviləsi", - Sviridenko cümə günü jurnalistlərə bildirib. Bloomberg bu amilləri Ukraynada hökumət dəyişikliyinin səbəbləri kimi qeyd edir.

Musavat.com