Onlayn ictimai-siyasi qəzet
Sovetdən qalan “ÖLÜM KAPSULU” sürətlə Azərbaycana yaxınlaşır – Təhlükə altındayıq
BBC Rus redaksiyasının yaydığı məlumata görə, 1972-ci ildə kosmosa buraxılmış və o vaxtdan bəri Yer orbitində dolaşan sovet mənşəli “Kosmos-482” adlı planetlərarası kosmik aparat yaxın günlərdə nəzarətsiz şəkildə Yerə düşəcək.
Musavat.com-un hazırladığı xəbərdə bildirilir ki, 495 kiloqramlıq kapsulun düşəcəyi ərazilər arasında Azərbaycan da var. Uçuş trayektoriyası onu Yaxın Şərq və Qafqaz üzərindən keçməyə məcbur edir və bu, ciddi təhlükə riski yaradır.
Bu xəbər, insanların kosmik texnologiyalar qarşısında nə qədər aciz olduğunu da göstərir. Əslində, “Kosmos-482” stansiyası 1972-ci ilin martında Baykonurdan buraxılmış və Veneraya doğru yola salınmalı idi. Lakin start zamanı raketin son mərhələsində texniki nasazlıq baş vermiş, nəticədə aparat Yer orbitində ilişib qalmışdı. Sovetlər uğursuzluğu gizlətmək üçün ona “Kosmos” adı vermişdi — bu, uğursuz interplanetar missiyaların “örtük adlandırması” idi.
NASA-nın məlumatlarına görə, “Kosmos-482” dörd hissəyə bölünüb. Onlardan ikisi orbitdən çıxaraq atmosferdə yanıb, lakin digər ikisi, o cümlədən 500 kiloqramlıq "spusk" aparatı hələ də elliptik orbitdə qalıb. Bu modul Veneranın amansız atmosferinə enmək üçün hazırlanıb. Onun istiliyə davamlı ekranı və hermetik gövdəsi Yer atmosferində də yanmadan keçə biləcək qədər dayanıqlıdır. Məhz bu səbəbdən, aparatın tamamilə yanmadan Yerə düşəcəyi ehtimalı çox yüksəkdir.
BBC-yə danışan kosmos araşdırmaçısı Georgi Trişkinin sözlərinə görə, orbitin analizi göstərir ki, düşmə trayektoriyası əsasən quru ərazilər üzərindədir: “Ehtimal olunan zolaq Misir, Suriya, Türkiyə və Azərbaycanın üzərindən keçir. Əgər aparat tam şəkildə yerə çatsa və 242 km/saat sürətlə zərbə vursa, bu, yüzlərlə qram trotil ekvivalentində partlayış gücündə bir enerji ortaya çıxara bilər.”
Kosmik aparatın Yerə düşəcəyi tarix tam dəqiq bilinməsə də, hesabatlara əsasən, bu, may ayının ilk yarısında — 8-dən 14-nə qədərki dövrdə baş verəcək. Düşmə prosesi tamamilə nəzarətsizdir. Fərqli olaraq, məsələn, “Mir” orbital stansiyası zamanında planlı şəkildə Sakit okeana yönləndirilmişdi. Lakin bu dəfə heç kim “Kosmos-482”ni yönləndirə bilmir.
Azərbaycana konkret təhlükə varmı?
Hazırda ehtimal zolağına daxil olan ölkələr arasında Azərbaycanın da adı çəkilir. Düşmə bu zolaqda yer alan hər bir ölkənin yaşayış məntəqələrində zərər riski yaradır. Ekspertlər bildirirlər ki, modulun nə qədər hissəsinin atmosferdə parçalanacağı və nə qədərinin Yerə çatacağı onun Yerə giriş bucağından və sürətindən asılı olacaq.
Yarım əsr əvvəl uğursuz startla orbitə ilişib qalan “Kosmos-482” indi Yer sakinlərini real təhlükə ilə üz-üzə qoyur. Sürətlə yaxınlaşan bu metal nəhəngin hara düşəcəyi, hansı zərərə səbəb olacağı bəlli deyil. Amma bu fakt artıq bəllidir: kosmosda buraxılan heç nə unudulmur. Gec-tez, o geri qayıdır — ya da üzərimizə düşür.
Musavat.com
XƏBƏR LENTİ
03 May 2025
ŞƏRHLƏRŞƏRH YAZ