Onlayn ictimai-siyasi qəzet
AZAL təyyarəsinin vurulmasında iştirak edən rus hərbçilərinin adları AÇIQLANDI – “Minval Politika”dan SENSASİON ARAŞDIRMA
2024-cü il dekabrın 25-də Azərbaycan Hava Yollarına (AZAL) məxsus Embraer 190 təyyarəsinin Rusiya tərəfindən vurulması ilə bağlı “Minval Politika” resursunun apardığı araşdırma sensasion faktları üzə çıxarıb.
Musavat.com xəbər verir ki, araşdırmada Rusiya hərbi komandanlığına məxsus konkret adlar və təfərrüatlar təqdim olunub.
Təyyarəyə zərbənin endirilməsində adı hallanan şəxslər bunlardır:
• Kapitan Dmitri Yevgenyeviç Pudovkin – 51-ci Hava Hücumundan Müdafiə (HHM) diviziyasının döyüş idarəetmə qrupunun baş naviqatoru;
• Polkovnik-leytenant Vladimir Viktoroviç Yanovski – Cənub Hərbi Dairəsinin əməliyyat növbətçisi;
• Polkovnik Gennadi Nikolayeviç Yeremenko – 4-cü Qvardiya Hərbi Hava Qüvvələri və HHM ordusunun döyüş komandanlığı növbətçisi.
Raketin buraxılmasına əmr verən şəxs:
Əsas qərarın general-mayor Aleksandr Tolopilo tərəfindən verildiyi bildirilir. O, 51-ci HHM diviziyasının komandiri olub və məhz onun əmri ilə raket atılıb. Hadisədən sonra isə Tolopilo məsuliyyəti öz üzərindən atmağa cəhd göstərərək, “raketlərin avtomatik öz-özünə məhv olduğunu” iddia edib. Daxili istintaq bu versiyanı təkzib etsə də, Tolopilo heç bir cəza almayıb, əksinə, vəzifədə irəlilədiyi deyilir.
“Minval Politika” redaksiyası vurğulayıb ki, hadisə ilə bağlı bütün şəxsi məlumatlar və əlaqə vasitələri Azərbaycan hüquq-mühafizə orqanlarına təqdim edilib. Araşdırma nəticəsində əldə edilən faktlara Rusiya tərəfi hələ də rəsmi münasibət bildirməyib, heç bir təkzib və cavab verilməyib.
Redaksiyadan sərt açıqlama:
“Minval Politika”nın baş redaktoru Emil Mustafayev bildirib:
“Rəsmi Moskva təqdim etdiyimiz sənədlərə reaksiya verməyib. Bu səssizlik göstərir ki, məlumatlarımız doğrudur və onların deyəcək sözü yoxdur”.
Redaksiya həmçinin qeyd edib ki, Tolopilo və digər hərbçilərlə birbaşa əlaqə qurmağa çalışıblar, lakin zənglər “+994” nömrələrindən gəldiyi üçün cavabsız qalıb.
Jurnalistlər Rusiya ictimaiyyətini və media nümayəndələrini bu məsələni diqqətlə izləməyə, Prezident Aparatı, Müdafiə Nazirliyi və Baş İstintaq Komitəsi qarşısında məsələ qaldırmağa çağırırlar.
Qeyd edək ki, dekabrın 25-də “Azərbaycan Hava Yolları”na məxsus sərnişin təyyarəsi Rusiya hava məkanına daxil olduqdan sonra raketlə vurulub.
Məsələ ilə bağlı araşdırmalar davam edir.
Musavat.com
XƏBƏR LENTİ
25 Iyul 2025
ŞƏRHLƏRŞƏRH YAZ