Onlayn ictimai-siyasi qəzet
İmamoğlunun casusluq işində İsa Qəmbərin adı hallandı - istintaq sənədlərində Azərbaycanla bağlı hissə ortaya çıxdı
İstanbul Böyükşəhər Bələdiyyəsinin həbsdə olan sabiq sədri Əkrəm İmamoğlu barəsində açılan casusluq işi yeni və diqqətçəkən istiqamətlər alır.
Musavat.com xəbər verir ki, Türkiyə mediasının yazdığına görə, İmamoğlunun yaxın çevrəsinə daxil olan və istintaq çərçivəsində dindirildiyi bildirilən şəxslər arasında Azərbaycanla bağlı bəzi faktlar da üzə çıxıb.
İstintaq materiallarında yer alan məlumatlara əsasən, dindirilmə zamanı ifadə verən Ü.D.A. adlı şəxs bildirib ki, Hüseyn Gün adlı Türkiyə vətəndaşı 2005-ci ildə ABŞ-da fəaliyyət göstərən hüquq bürosu vasitəsilə “Freedom LLC” adlı şirkətin yaradılmasını təşkil edib. Onun sözlərinə görə, bu şirkət vasitəsilə “Azərbaycanın demokratikləşməsi” adı altında müəyyən şəxslərə, o cümlədən həmin dövrdə Müsavat Partiyasının başqanı İsa Qəmbərə maliyyə dəstəyi göstərilib.
Mənbənin sözlərinə görə, bu vəsaitlərin əsas məqsədi Cənubi Qafqaz regionunda, xüsusilə də Azərbaycanda müxalif qüvvələri gücləndirmək, siyasi proseslərə təsir göstərmək və həmin dövr üçün Vaşinqtonun maraqlarına uyğun bir siyasi mühit formalaşdırmaq olub.
İstintaq sənədlərində qeyd edilir ki, bu şirkət və onun təsisçiləri Qərbdə müxtəlif fondlar və siyasi analitik mərkəzlərlə əməkdaşlıq münasibətlərinə malik olublar. Həmin əlaqələrin bir hissəsi Türkiyədəki siyasi strukturlar və yerli media qurumları üzərindən həyata keçirilib.
Ermənistanla bağlı əlaqələr də aşkarlanıb
Türkiyə dövlət mediası isə xəbər verir ki, istintaq çərçivəsində adı çəkilən Hüseyn Günün telefonunda 34 nəfərlə əlaqə nömrəsi tapılıb. Onların arasında keçmiş dövlət başçıları, diplomatlar və yüksək rütbəli hərbçilər var.
Mənbənin bildirdiyinə görə, bu siyahıya aşağıdakı tanınmış adlar daxildir:
▪️ Ermənistanın sabiq prezidenti Armen Sarkisyan,
▪️ Ermənistanın sabiq baş naziri Karen Karapetyan,
▪️ İsrailin keçmiş baş naziri Ehud Olmert,
▪️ İsrailin sabiq prezidentinin oğlu Şemi Peres,
▪️ ABŞ prezidentinin keçmiş müşaviri (2017–2019) Fiona Hill.
Hüseyn Gün ifadəsində bildirib ki, bu nömrələrin telefonunda olması onun “əvvəlki kommersiya və iqtisadi fəaliyyəti” ilə əlaqədardır. O, bu əlaqələrin “heç bir siyasi və ya casusluq məqsədi daşımadığını” iddia edib.
İmamoğlu və çevrəsinə qarşı istintaq dərinləşir
Əkrəm İmamoğlu və onun yaxın ətrafı – o cümlədən seçki kampaniyası rəhbəri Necati Özkan və jurnalist Merdan Yanardağ – barəsində Türkiyə Baş Prokurorluğu tərəfindən irəli sürülən “casusluq” ittihamı son günlərdə geniş rezonans doğurub.
Rəsmi məlumatlara görə, istintaq orqanları İmamoğlunun yaxın əlaqələrinin xarici təşkilatlar və qeyri-hökumət şəbəkələri ilə əlaqələrini araşdırır. Xüsusilə “Freedom LLC” xətti üzrə aparılan maliyyə axınlarının həm Türkiyə, həm də region ölkələri, o cümlədən Azərbaycanla bağlı siyasi fəaliyyətlərdə istifadə oluna biləcəyi iddia olunur.
Hazırda bu məsələ ilə bağlı araşdırmaların davam etdiyi və həm Türkiyə, həm də ABŞ-dakı bəzi qurumlarla hüquqi əməkdaşlıq mexanizmlərinin işə salındığı bildirilir.
Hazırda İmamoğlu, Özkan və Yanardağ barəsində məhkəmə qərarı ilə həbs qətimkan tədbiri seçilib. Onların barəsində irəli sürülən ittihamlar təsdiqlənərsə, bu, Türkiyədə son illərin ən səs-küylü “casusluq işi” ola bilər.
Musavat.com
XƏBƏR LENTİ
28 Oktyabr 2025
ŞƏRHLƏRŞƏRH YAZ