Onlayn ictimai-siyasi qəzet
Paşinyan İrəvandakı qarşıdurmaların suçunu onlara yüklədi: “Boyun əymədilər, toqquşmanı başlatdılar”
Ermənistanın baş naziri Nikol Paşinyan İrəvanda kilsə tərəfdarlarının iştirakı ilə baş verən son qarşıdurmalarla bağlı məsuliyyətin kimin üzərində olduğunu açıq şəkildə bəyan edib.
Musavat.com xəbər verir ki, Paşinyan hüquq-mühafizə orqanlarının təxribatlara uymadığını və etirazçılar tərəfindən zorakılığa sövq olunduqlarını bildirib.
“Paytaxtda qarşıdurmaların kim tərəfindən başladığı artıq bəllidir. Hüquq-mühafizə orqanlarının əməkdaşlarının təxribatlara boyun əymədiyini görən onlar – yəni toplanan etirazçılar – özləri toqquşmaya əl atıblar”, - deyə baş nazir vurğulayıb.
Paşinyanın bu bəyanatı erməni mediasında geniş rezonans doğurub.
“Haykakan Zhamanak” qəzeti hadisələrin arxasında təxribatçı dairələrin dayandığını qeyd edir və Paşinyanın bu fikrini sitat gətirir:
“Polis və xüsusi xidmət təxribatlara qarşı hər hansı zorakı addım atmadı. Bu, süni şəkildə hazırlanmış bir ssenari idi”.
“Armenpress” agentliyi isə Paşinyanın etirazçıları qəsdən gərginlik yaratmaqda ittiham etdiyini yazır:
“O adamlar qarşıdurma istədi, polis isə təmkinli davrandı”.
“Oragir” xəbər saytı Paşinyanın bu fikrini ön plana çıxarıb:
“Hüquq-mühafizə orqanları əmrə əməl etdi, ancaq kütlə içindəki təxribatçılar mümkün qədər qarşıdurma yaratdılar”.
Müxalif dairələr, revanşist kilsə çevrələri və bəzi ictimai fəallar isə hadisələrin məsuliyyətini əksinə, hökumətin üzərinə qoymağa çalışırlar. Onlar hüquq-mühafizə orqanlarının sərt davranışını tənqid edir, Paşinyanı xalqın iradəsinə qarşı çıxmaqda ittiham edirlər.
Hazırda Ermənistanda həm kilsə ilə münasibətlər, həm də sosial-siyasi mühit ciddi gərginlik mərhələsindədir. Baş nazir Nikol Paşinyan isə ilk dəfə olaraq bir erməni rəhbər kimi kilsənin təsirinə qarşı açıq mövqe nümayiş etdirir.
Musavat.com
ƏLAQƏLİ XƏBƏRLƏR
XƏBƏR LENTİ
27 Iyun 2025
ŞƏRHLƏRŞƏRH YAZ