Onlayn ictimai-siyasi qəzet
“Tarixi yanlış təsəvvürlər dəyişməsə, ermənilərlə birgəyaşayış mümkün deyil” – Ayaz Salayev
Azərbaycan kinorejissoru və kinoşünası Ayaz Salayev Musavat.com-a verdiyi açıqlamada ermənilərlə birgəyaşayışın mümkün olub-olmaması barədə fikirlərini bölüşüb.
O bildirib ki, erməni ictimai şüurunda geniş yayılmış, kök salmış bir təsəvvür var – guya Azərbaycanın əksər əraziləri tarixi erməni torpaqlarıdır və ümumiyyətlə, Azərbaycan milləti heç vaxt mövcud olmayıb:
“Onların iddiasına görə, guya azərbaycanlılar Altay dağlarından köçüb gələn tayfalardır və bu tayfalar yerli erməniləri öz torpaqlarından qovaraq onların mədəniyyətini – mətbəxini, musiqisini, adət-ənənələrini mənimsəyiblər”.
Ayaz Salayev vurğulayıb ki, bu cür yanlış və təhrif olunmuş tarixi yanaşma təkcə fərdi düşüncə deyil, bütövlükdə Ermənistanın milli ideologiyasının əsas sütunlarından biridir:
“Məsələn, Ermənistanın gerbində yer alan dağ simvolu – Ağrı dağı – əslində Ermənistan ərazisində yerləşmir və heç zaman da yerləşməyib. Amma bu dağ onların milli rəmzi, simvolik identifikasiyası halına gətirilib, hətta futbol komandalarının adlarında da, konyaklarında da yer alır”.
Onun sözlərinə görə, bu düşüncə forması sıradan bir yanlışlıq deyil – bu, müəyyən ideoloji təməllər üzərində qurulmuş və tarix boyu bəzi imperiya ideyalarına, o cümlədən “dünya inqilabı”, “böyük Almaniya”, “Rus dünyası” və “dənizdən-dənizə böyük Ermənistan” kimi utopik və ekspansionist planlara söykənir. Belə ideyalar “dünya düzgün qurulmayıb, biz onu yenidən qurmalıyıq” kimi radikal yanaşmaların məhsuludur.
Ayaz Salayev hesab edir ki, əgər bu təfəkkür – yəni reallıqdan uzaq, tarixi təhrif edən və digər xalqların hüquqlarını tanımayan bu ideoloji təsəvvür erməni ictimai şüurundan silinsə, o zaman azərbaycanlılarla ermənilərin birgə dinc yaşayışı real və mümkün ola bilər.
Qeyd edək ki, Azərbaycanla Ermənistan arasında paraflanmış sülh sazişi mətnində maddələrdən biri də odur ki, tərəflər dözümsüzlük, irqi nifrət və ayrı-seçkilik, separatizm, zorakı ekstremizm və terrorizmin bütün təzahürlərini pisləyirlər və özlərinin müvafiq yurisdiksiyaları çərçivəsində bu hallarla mübarizə aparacaqlar və özlərinin bununla bağlı müvafiq beynəlxalq öhdəliklərinə əməl edəcəklər.
Afaq Mirayiq,
Musavat.com
XƏBƏR LENTİ
29 Avqust 2025
ŞƏRHLƏRŞƏRH YAZ