Onlayn ictimai-siyasi qəzet
“Prezidentin müsahibəsindən Ermənistan o qənaətə gəlməlidir ki...”
“Azərbaycan Prezidentinin “Əl Ərəbiyyə” kanalına verdiyi müsahibədə səsləndirdiyi fikirlər, tezislər dövlətimizin xarici siyasət prioritetlərini özündə cəmləyən və onillikləri əhatələyən “Yol xəritəsi”dir”.
Bu sözləri Musavat.com-a siyasi təhlilçi Sona Əliyeva deyib.
Onun sözlərinə görə, Dövlətimizin Başçısı bu müsahibəsində çox ciddi siyasi mesajlar ünvanlayıb: “Ölkə başçısı bildirdi ki, Birləşmiş Ştatlarda imzalanan memorandum əslində prezident Əliyevlə baş nazir Paşinyanın razılaşması deyil, Azərbaycanla Ermənistan arasında əldə olunan razılaşma kimi başa düşülməlidir. Yəni Ermənistanda hökumətlər dəyişsə, yenilənsə də bu razılaşmanın mətni və məğzi dəyişməyəcək. Əgər bundan sonra Ermənistanda revanşist qüvvələr baş qaldırarsa, bu sülh sazişinin mətninin pozulması anlamına gələcək və zərurət yarandığı halda Azərbaycan dərhal reaksiya verəcək. Prezidentin sonuncu müsahibəsindəki fikirləri əslində həm də İrəvandakı siyasət dəllalarına, radikal müxalifətə, eləcə də indiki hakimiyyətə bir ismarıc kimi başa düşülməlidir. Prezidentin müsahibəsindən Ermənistan o qənaətə gəlməlidir ki, indi tutduqları yol İrəvan üçün daha sərfəlidir. Birincisi, regiona əbədi sülh gəlir. İkincisi, Zəngəzur dəhlizinin açılması ilə Ermənistan büdcəsinə yeni tranzithaqqı vəsaitləri daxil olacaq. Üçüncüsü, Zəngəzur dəhlizinin Ermənistandan keçən hissəsinin tikintisini Birləşmiş Ştatlardan olan şirkətlər həyata keçirə bilər ki, bu da dəhliz üçün təhlükə mənbəyi hesab edilən “Rusiya xofu”nun aradan qalxmasına gətirib çıxaracaq. Birləşmiş Ştatlarda imzalanan saziş həm də Kremlin Zəngəzur zolağında neytrallaşdırılmasına gətirib çıxardı. Ölkə başçısının müsahibəsindən gəlinən qənaət odur ki, ölkəmiz bütün qonşuları ilə mehriban dostluq münasibətlərini daha da möhkəmləndirməkdə israrlıdır. İranla, Rusiya ilə balanslı siyasi xətti qorumaqla iqtisadi və siyasi əməkdaşlıqlarda əvvəlki isti münasibətləri qorumaq və etibarlı tərəfdaş imicimizi davam etdirmək əsas məqsədlərimizdəndir. Bu baxımdan, düşünmək olar ki, Azərbaycan yaxın on illiklərdə sürətli inkişaf və regional təhlükəsizliyin əsas beyin mərkəzi funksiyasını yerinə yetirən oyunçu missiyasını davam etdirəcək”.
Cavanşir ABBASLI
Musavat.com
XƏBƏR LENTİ
31 Avqust 2025
30 Avqust 2025
ŞƏRHLƏRŞƏRH YAZ