Onlayn ictimai-siyasi qəzet
Tankerlərdə olan neftin həcmi rekorda çatıb – Qiymətlər sürətlə düşəcək
Dünya okeanında tankerlərdə olan neftin həcmi son iki ildən artıq müddət üçün ən yüksək həddə çatıb. Musavat.com xəbər verir ki, məlumatı daşımaları izləyən şirkətlərə istinadən Bloomberg yayıb.
Belə ki, Vortexa-nın məlumatına görə, hazırda sularda tankerlərlə təxminən 1,25 milyard barel neft daşınır ki, bu da 2023-cü ilin aprelindən bəri ən yüksək həcmdir. Digər analitik şirkəti Kpler isə hazırkı rəqəmin 2023-cü ilin iyun ayından bəri ən yüksək göstərici olduğunu açıqlayıb.
Bloomberg-in məlumatına görə, bu, həm OPEC daxilində, həm də xaricdə artan tədarükü əks etdirir. Beynəlxalq Enerji Agentliyinin proqnozlaşdırdığına görə, bu ilin dördüncü rübündə və 2026-cı ilin birinci rübündə daşıma həcmlərinin artmağa davam edəcəyi gözlənilir ki, bu da gələn il dünya bazarında rekord miqdarda neft bolluğuna səbəb olacaq.
Bu, çox güman ki, neft qiymətlərinə təzyiq göstərəcək, lakin gəmi sahiblərinin xeyrinə olacaq. Nəhəng supertankerlərin sahiblərinin gəliri son günlərdə azalsa da, son həftələrdə gündəlik 100.000 dollara yaxınlaşıb.
Bildirilir ki, neft tankerlərinin belə artımında sentyabrda Yaxın Şərqin xam neft ixracının əhəmiyyətli dərəcədə artması əsas amildir. Bu isə yalnız OPEC+ hasilatının artmasının təsiri deyil: oktyabr ayında Yaxın Şərqin neft emalı müəssisələrinin əhəmiyyətli bir hissəsi profilaktik texniki xidmət üçün fəaliyyətini dayandıracaq. Beləliklə, emala yönəldilməli həcmlər də bazara daşınır.
Bundan əlavə, ABŞ və Qərbi Afrikadan Asiyaya artan xam neft daşınması da daha uzun tanker səfərlərinə və daha çox dənizdə daşınan xam neft həcmlərinin artmasına təkan verib.
Hesablamalara görə, sentyabrda dünya bazarına gündəlik neft təklifində 2 milyon barellik artım olub.
Musavat.com
XƏBƏR LENTİ
04 Oktyabr 2025
ŞƏRHLƏRŞƏRH YAZ