Onlayn ictimai-siyasi qəzet
Yanğının mətbuat xidməti
“Fəraqın odunu gördükcə mum tək əridi,
Səbatü səbrdə fulad gördügün könlüm".
(Məhəmməd Füzuli)
Ticarət mərkəzində yanğın oldu, oranın mətbuat xidmətinin müdiri Kəmaləddin müəllim hadisənin obyektdə baş verməsini inkar etdi: “Ora bizim ərazi deyil”. Lakin digər Kəmaləddin müəllimin idarəsi - FHN yanğının məhz ticarət mərkəzinə məxsus anbarda olduğunu açıqladı. Hansı Kəmaləddin müəllim haqlıdır, biz bilmirik. Əsas odur sakitçilik olsun, sabitlik pozulmasın.
Sözgəlişi, ticarət mərkəzinin mətbuat xidmətinin olması sevindiricidir. Gör ölkəmizdə söz və mətbuat azadlığı nə qədər inkişaf etmişdir. Bəlkə altdan-altdan qəzet də çıxarırlar, satıcı və alıcılara satırlar. Azərbaycanı illik söz azadlığı reytinqlərində axırıncı yerlərə qoyan “Sərhədsiz reportyorlar” kimi təşkilatlar bunu niyə görmür? Yəqin alveri “Sədərək”dən eləmirlər. Ya da Makronun sifarişini yerinə yetirirlər.
Mövzu açılmışkən, hazırda bizdə bütün özünə hörmət qoyan idarə və müəssisələrin, şəxsiyyət və obyektlərin hər birisinin mətbuat xidməti vardır. Bu yaxında bir dostum mənə link göndərmişdi, orfda müğənni Röyanın mətbuat xidməti hansısa açıqlama yayırdı. Rayon icra hakimiyyətlərində şöbə müdirlərinin, kənd təsərrüfatı üzrə tarlalarda əkinçiliklə məşğul olanların, metronun hər bir vaqonunun mətbuat xidməti fəaliyyət göstərir. Yaşıl xəttin mətbuat xidməti ayrıdır, bənövşəyi xəttinki ayrı. Arada “Cəfər Cabbarlı” stansiyasının keçidində birgə brifinq keçirirlər.
Bakı-Ucar avtobus marşrutu haqda mətbuata bir yoldaş məlumat verir, Bakı-Samux istiqaməti üzrə digəri.
Elə mətbuat xidməti var ki, onun özünün də mətbuat xidməti yaradılmışdır. Bunu zarafat, satira-zad kimi yazmıram, gerçəkdən belədir. Məsələn, bəzi qəzet və telekanalizasiyalarımızın öz mətbuat xidmətləri yaradılıbdır. Bu, “mətbuatın mətbuat xidməti” deyilsə, nədir?
Yanğın üzrə mətbuat xidməti ilə zəlzələ üzrə mətbuat xidməti fərqləndirilmişdir, çünki bunların hərəsinin işi spesifikdir. Doğrudan da, Pirsaat çayında sel gəlsə, bunu xalqa çatdıran adam eyni zamanda Xəzərin dayazlaşması haqqında necə danışsın? Bunlar hər birisi ayrı-ayrı elm sahələridir.
Bəzən bu mətbuat xidmətlərinin yerlərini dəyişirlər ki, mətbuat üçün əlavə informasiya yaransın, bekar qalıb acından ölməyək. Təbii, bizə yaradılan bu münbit şəraitə görə hökumətə dərin minnətdarlığımızı bildiririk. Yanğın da vaxtında söndürüldü - anbar yanıb qurtarandan sonra. Yəqin vaxtında anbar müdiriyyətinə yanğın təhlükəsizliyi qaydaları barədə lazımi xəbərdarlıq edilmiş, divardan keçən naqillər möhürlənmiş, havada uçan milçəklərin qanadları da Qida Təhlükəsizliyi Agentliyi tərəfindən yolunmuşdur.
Bayaqları “elm sahələri” ifadəsi işlətdim, internet-serfinq edərkən rastıma çıxan bir elmi məlumatı hörmətli oxucularımla bölüşmək istəyirəm. Əminəm bu informasiya onların işinə dəhşət yarayacaqdır. (Hazırda ölkəmizdə nə olursa dəhşət olur. Məsələn, yanğın dəhşət idi, avariyalar dəhşətli olur, ər arvadını dəhşətlə öldürür və sairə. Əsas sabitlikdir, əlbəttə). Əlqərəz, həmin informasiya belədir ki, Milli Elmlər Akademiyamız nəzdində fəaliyyət göstərən alimlərdən birinin elmi işinin mövzusu bu cür idi: “Müstəqillik dövrü "Azərbaycan" jurnalında milli-mənəvi dəyərlərin bədii ifadəsi". Məhz bu temaya görə yoldaşa fəlsəfə elmləri doktoru (kül başına, Aristotel) dərəcəsi verilib, hər ay isə maaşına 60 manat əlavə alacaqdır.
Halal olsun, nə deyə bilərik. Ümid edək orada “Sovet dövrü "Kirpi" jurnalında tənqid olunan zavmaqların bədii obrazı" mövzusunda doktorluq işləri də hazırlanır, çünki bu dəqiqə bizə lazım olan əsas şey budur.
Sonda bir ülvi arzumu yazaraq nöqtə qoyuram: inşallah, gün olsun burada yazıları mənim əvəzimə mətbuat xidmətim yazsın, sizin də yerinizə oxucuların mətbuat xidməti oxusun.
Zamin HACI 
XƏBƏR LENTİ
30 Avqust 2025
ŞƏRHLƏRŞƏRH YAZ