Onlayn ictimai-siyasi qəzet
Avropa liderlərinin Trampla telefon danışığı başa çatıb: Hansı razılaşmalar əldə olunub?
Ukrayna ərazilər məsələsini müzakirə etməyə hazırdır, lakin Rusiyanın işğal olunmuş ərazilər üzərində suverenliyinin hüquqi tanınmasından söhbət getmir. Musavat.com xəbər verir ki, bunu Almaniya kansleri Fridrix Merz Ukrayna prezidenti Vladimir Zelenski ilə birgə mətbuat konfransında deyib.
O, ABŞ prezidenti Donald Trampla digər Avropa liderlərinin də qoşulduğu telefon danışığının məzmununu qısaca danışıb. Merzin sözlərinə görə, Trampa izah edilib ki, əvvəlcə cəbhədə atəşkəs yaradılmalıdır və yalnız bundan sonra tərəflər müharibəni dayandırmaq üçün uzunmüddətli saziş bağlamağa çalışacaqlar: "Ukrayna ərazi məsələlərini müzakirə etməyə hazırdır, lakin başlanğıc nöqtəsi cəbhə xətti olmalıdır. Rusiya işğalının tanınması isə müzakirə mövzusu deyil".
Kanslerin sözlərinə görə, Trampa Ukrayna və Avropanın tutduğu bir sıra digər mövqelər də izah edilib. Xüsusilə qeyd olunur ki, proses Alyaskadakı görüşdən sonra davam edərsə, növbəti danışıqlar masasında Kiyev olmalıdır. Merz həmçinin qeyd edib ki, Ukrayna ordusu dövləti müdafiə etmək qabiliyyətini saxlamalıdır, lakin o, eyni zamanda Ukrayna üçün “həyat qabiliyyətli və uzunmüddətli təhlükəsizlik təminatlarına” ehtiyac olduğunu qeyd edib.
Ukrayna prezidenti Vladimir Zelenski isə deyib ki, bu gün Almaniyada görüşən bütün liderlər “Ukraynada sülh, Avropada sülh” istəyir. O, Donald Trampın Vladimir Putinlə danışıqlarından əvvəl bir sıra prinsiplər üzərində razılaşdıqlarını izah edib və Ukrayna ilə bağlı hər şeyin Ukrayna ilə müzakirə edilməli olduğunu vurğulayıb.
O bildirib ki, Tramp Ukrayna üçün atəşkəs və təhlükəsizlik təminatlarını dəstəkləyir: "Rusiyanın Ukraynanın NATO-ya üzvlük perspektivləri ilə bağlı veto hüququ olmamalıdır. Rusiyaya qarşı birgə təzyiq olmalıdır, sanksiyalar olmalıdır və mesaj olmalıdır ki, Rusiya Alyaskada atəşkəslə razılaşmasa, bu prinsip işləməlidir".
Zelenski Trampa və Avropa liderlərinə deyib ki, “Putin blef edir – o, bütün cəbhə boyu irəliləməyə çalışır”: "Putin sanksiyalara əhəmiyyət vermədiyini və onların işə yaramadığını deyəndə də blef edir. Əslində, sanksiyalar çox təsirlidir və Rusiyanın hərbi iqtisadiyyatına ziyan vurur".
Siyasətçi bildirib ki, görüşdə o, “Putin sülh istəmir – ölkəmizi işğal etmək istəyir” deyib.
Fransa prezidenti Emmanuel Makronun sözlərinə görə, Tramp Avropa liderlərinə “Putinlə görüşdə Ukraynada atəşkəsə nail olmaq istədiyini” deyib. Telefon danışığından sonra mətbuata açıqlama verən Makron jurnalistlərə bildirib ki, liderlər daha aktiv əsir mübadiləsi və müharibə zamanı Rusiya tərəfindən qaçırılan ukraynalı uşaqların azad edilməsi çağırışlarını da dəstəkləyiblər.
O, həmçinin Trampın Avropa liderlərini Ukrayna ilə bağlı istənilən ərazi məsələlərinin Ukraynanın iştirakı olmadan həll edilə bilməyəcəyinə inandırdığını deyib və əlavə edib: “Və biz bu mövqeyi dəstəkləyirik”. Makron həmçinin bildirib ki, liderlər Ukrayna üçün istənilən potensial ərazi güzəştləri ilə təhlükəsizlik təminatları arasında aydın əlaqənin olması lazım olduğunu açıqlayıblar.
Musavat.com
XƏBƏR LENTİ
14 Avqust 2025
ŞƏRHLƏRŞƏRH YAZ