Onlayn ictimai-siyasi qəzet
Bakı susuz şəhərə çevrilir - İnstitut rəsmisi problemin kritik olacağını deyir
Son günlər Bakıda və ətraf yaşayış məntəqələrində içməli su təchizatında fasilələr müşahidə olunur. Bu vəziyyət həm paytaxt sakinləri, həm də kənd əhalisi üçün gündəlik həyatın çətinləşməsinə səbəb olur.
Əhali bildirir ki, suyun fasilələrlə verilməsi gündəlik işləri çətinləşdirir, evdə və ictimai yerlərdə su təminatı qeyri-müntəzəm olur. Azərbaycanda, xüsusilə Kürdəmir, Yevlax, Goranboy və Samux rayonlarında vəziyyət daha kritikdir. Burada təmiz su mənbələrinin azalması və mövcud anbarların doluluq səviyyəsinin aşağı düşməsi vəziyyəti daha da ağırlaşdırır.
Dövlət qurumları və beynəlxalq tərəfdaşlar su qıtlığının qarşısını almaq üçün tədbirlər həyata keçirir. Məsələn, Kürdəmir, Yevlax, Goranboy və Samux rayonlarında 10.000-ə yaxın sakin üçün içməli su, suvarma və kanalizasiya sistemlərinin qurulmasını nəzərdə tutan layihələr həyata keçirir. Həmçinin Bakı şəhərində su təchizatını yaxşılaşdırmaq məqsədilə yeni layihələr üzərində işlər davam etdirilir.
Hazırda su qıtlığı problemi əhalinin gündəlik həyatını çətinləşdirir, lakin həyata keçirilən layihələr və tədbirlər müəyyən qədər vəziyyəti yüngülləşdirir. Mütəxəssislər gələcəkdə daha genişmiqyaslı tədbirlərin zəruri olduğunu bildirirlər.
Coğrafiya İnstitutunun şöbə müdiri Mirnuh İsmayılov Musavat.com-a açıqlamasında bildirib ki, su ehtiyatlarımız tədricən azalmaqdadır. Bu, ölkənin su təminatını daha da çətinləşdirir və gələcəkdə ciddi problemlərə yol aça bilər:
“Azərbaycanın su ehtiyatları tədricən azalmaqdadır və bu, ölkənin su təminatını ciddi şəkildə çətinləşdirir. Əsas səbəblərdən biri iqlim dəyişikliyi nəticəsində yağıntı miqdarının azalması və yüksək buxarlanma səviyyəsidir. Digər mühüm amil isə su anbarlarının doluluq səviyyəsinin aşağı düşməsidir, xüsusilə Kür və Araz çayları üzərindəki rezervuarlar tam səmərəli istifadə edilmir.
Bu vəziyyət həm kənd təsərrüfatında suvarma problemlərinə, həm də içməli su təminatında fasilələrə səbəb olur. Gələcəkdə su çatışmazlığı əhalinin gündəlik həyatına və iqtisadi fəaliyyətinə ciddi təsir göstərə bilər. Xüsusilə şəhərlərdə və sənaye müəssisələrinin çox olduğu bölgələrdə içməli suyun fasiləli verilməsi böyük sosial narahatlığa yol aça bilər.
Bunun qarşısını almaq üçün ölkə üzrə su ehtiyatlarının səmərəli idarə olunması, yeni anbarların tikilməsi və mövcud su şəbəkələrinin modernləşdirilməsi zəruridir. Eyni zamanda, əhali və müəssisələr arasında su istifadəsinə nəzarətin gücləndirilməsi vacibdir ki, gələcəkdə su qıtlığı risklərini minimuma endirmək mümkün olsun”.
Sultan Məmmədli
Musavat.com
XƏBƏR LENTİ
28 Avqust 2025
ŞƏRHLƏRŞƏRH YAZ