Onlayn ictimai-siyasi qəzet
Britaniya HƏMAS rəhbərliyindəki əsas şəxslərə qarşı HƏRƏKƏTƏ KEÇİR
Böyük Britaniya iki dövlət çərçivəsində həllin mümkünlüyünü qorumaq və İsrail ilə Fələstin xalqları arasında davamlı sülhə yol açmaq məqsədilə Fələstin Dövlətini rəsmi olaraq tanıdığını elan edib.
Bu barədə Musavat.com-a Böyük Britaniya Xarici İşlər, Birlik və İnkişaf Ofisindən verilən məlumatda bildirilib.
Qeyd olunub ki, hökumət, Qəzzadakı dəhşətli vəziyyətin daha da pisləşdiyi, İsrailin Qərb Sahilində qeyri-qanuni məskunlaşmalarını genişləndirdiyi və HƏMAS-ın girovları saxlamaqda davam etdiyi bir vaxtda iki dövlət çərçivəsində həll perspektivini qorumaq üçün addım atır.
Açıqlamada bildirilir:
“Baş nazir açıq şəkildə bildirib ki, HƏMAS-ın Fələstinin gələcəyində heç bir rolu olmayacaq və bir daha onları girovları dərhal və qeyd-şərtsiz azad etməyə çağırıb.
Bu tarixi addım Kanada və Avstraliya kimi yaxın müttəfiqlərlə birlikdə, sülh yolunu dəstəkləmək, həm İsrail, həm də Fələstin xalqlarının bərabər hüquqlarını qorumaq məqsədilə daha geniş beynəlxalq səylərin bir hissəsi olaraq atılıb.
Böyük Britaniya, iki dövlət çərçivəsində həllin mümkünlüyünü qorumaq, İsrail və Fələstin xalqları arasında davamlı sülh yolunu açmaq məqsədilə Fələstini rəsmi olaraq tanıyıb.
Kanada və Avstraliya ilə birlikdə elan olunan bu tarixi qərar, Qəzzada vəziyyətin daha da pisləşdiyi, İsrailin Qərb Sahilində qeyri-qanuni məskunlaşmalarını genişləndirdiyi və HƏMAS-ın girovları saxlamaqda davam etdiyi bir vaxtda verilib.
İyul ayında Baş nazir bildirmişdi ki, əgər vəziyyət dəyişməsə, tədbir görəcək. O, Böyük Britaniyanın İsrail və Fələstin arasında sülh dolu gələcəyi dəstəkləmək üçün əxlaqi məsuliyyət daşıdığına qəti şəkildə inanır. Lakin, təəssüf ki, bu perspektiv getdikcə daha da uzaqlaşır.
İki dövlət çərçivəsində həll-yəni, təhlükəsiz və güclü İsrailin, islahatlar aparmış Fələstin Administrasiyası tərəfindən idarə olunan, yaşaya bilən və suveren Fələstin dövləti ilə yanaşı mövcud olması-İsrail və Fələstin xalqları üçün son iki ildə yaşanan ağır zorakılıq və əzabdan uzaq, davamlı sülhə aparan yeganə yoldur.
Fələstinin tanınması hökumətin seçki proqramında götürdüyü öhdəliyə və Fələstin xalqının öz ayrılmaz müqəddəratını təyinetmə hüququna əsaslanan tarixi bir qərardır.
Baş nazir bu gün verdiyi bəyanatda vurğulayıb ki, bu qərar HƏMAS-la bağlı deyil. HƏMAS İsrailin məhvini istəyən amansız bir terror təşkilatıdır. İsrail və Fələstinin tanınmış sərhədlərlə yanaşı, sülh şəraitində birgə yaşaması isə onların nifrət dolu baxışlarının tam əksidir.
Hökumətin HƏMAS-a qarşı tələbləri dəyişməz olaraq qalır. Onlar bütün girovları azad etməli, dərhal atəşkəsə razı olmalı, Qəzzanın idarəsində heç bir rolları olmayacağını qəbul etməli və silahsızlanmaya sadiq qalmalıdırlar”.
Açıqlamada həmçinin bildirilib ki, Böyük Britaniyanın yaxın həftələrdə HƏMAS rəhbərliyindəki əsas şəxslərə qarşı əlavə sanksiyalar tətbiq edəcəyi və girovların azad olunması üçün bütün mümkün addımları atmağa davam edəcəyi gözlənilir:
“İsrailin və onun xalqının təhlükəsizliyinə dəstəyimiz dəyişməzdir. Lakin İsrail hökuməti də siyasətini dəyişməli, Qəzzadakı hərbi əməliyyatları dayandırmalı, təcili humanitar yardıma icazə verməli və Qərb Sahilində qeyri-qanuni məskunlaşmaları dayandırmalıdır.
Xarici işlər naziri İvet Kuper bildirib:
“Bu gün yaxın müttəfiqlərimizlə birlikdə qəbul etdiyimiz tarixi qərar-Fələstin Dövlətini tanımaq-iki dövlət çərçivəsində həllə sarsılmaz sadiqliyimizi və Fələstin xalqının öz müqəddəratını təyinetmə hüququnu təsdiqləyir”.
“Fələstinin tanınması, iki dövlət çərçivəsində həllin qorunması üçün xüsusilə vacibdir, çünki bu həll indi misli görünməmiş təhlükə altındadır. İki dövlət çərçivəsində həll həm israillilər, həm də fələstinlilər üçün uzunmüddətli sülh və təhlükəsizliyin yeganə yoludur”.
“Biz açıq şəkildə bildiririk ki, HƏMAS-ın Fələstinin gələcəyində yeri yoxdur - onlar iki dövlət ideyasına qarşı çıxan vəhşi bir terror təşkilatıdır. Onlar girovları azad etməli və Qəzzada hər hansı bir nəzarətdən imtina etməlidirlər. Amma HƏMAS fələstinliləri təmsil etmir”.
“Fələstinin tanınması sülh üçün atılan addımlardan yalnız biridir. Qəzzadakı münaqişəyə son qoymalı, bütün girovların azad olunmasını təmin etməli və ehtiyacı olanlara humanitar yardım çatdırmalıyıq. Bunun üçün təkcə dərhal atəşkəs deyil, həm də davamlı sülh üçün konkret bir plan lazımdır və bu, bu həftə BMT-də diplomatik fəaliyyətimin əsasını təşkil edəcək”.
1950-ci ildə İsrail Dövlətini tanıyan Böyük Britaniya hesab edir ki, artıq yalnız bir dövləti tanımaqla iki dövlət çərçivəsində həllə dəstəyi inandırıcı şəkildə davam etdirə bilməz.
Bu qərar hökumətin Fələstin Administrasiyasından tələb etdiyi genişmiqyaslı islahatların aparılması öhdəliyini aradan qaldırmır. Prezident Abbas bu islahatlara, o cümlədən atəşkəsdən bir il sonra yeni seçkilərin keçirilməsinə sadiq olduğunu bildirib.
Böyük Britaniya, Fələstin Administrasiyasının bu islahatları həyata keçirməsi və Fələstin Dövlətinin qurulması üçün texniki və maliyyə dəstəyini davam etdirəcək. Bu işdə Böyük Britaniyanın Fələstin Administrasiyasında İdarəetmə üzrə Nümayəndəsi Ser Maykl Barberin fəaliyyəti də mühüm rol oynayır.
Hökumət açıq şəkildə bildirir ki, təkcə tanınma, mövcud vəziyyəti dəyişmək üçün kifayət deyil. Məhz buna görə də bu qərar Qəzzada idarəetmə, təhlükəsizlik, humanitar çıxış və atəşkəsə nəzarət, eləcə də iki dövlətli həllin əsaslarını əhatə edən Sülh Çərçivəsi üzrə beynəlxalq səylərin bir hissəsidir.
Böyük Britaniya bu planı irəli aparmaq üçün müttəfiqləri ilə sıx əməkdaşlıq edəcək və Fələstinin tanınması bu yolun ilk və ən vacib addımıdır”, - deyə açıqlamada qeyd olunub.
Nigar HƏSƏNLİ,
Musavat.com
XƏBƏR LENTİ
23 Sentyabr 2025
22 Sentyabr 2025
ŞƏRHLƏRŞƏRH YAZ