Onlayn ictimai-siyasi qəzet
Ermənistanın Yekaterinburqdakı konsulu vuruldu: İrəvan dözmədi...
Ermənistanın Yekaterinburqdakı fəxri konsulu Narek Spartakyan sülh prosesinə qarşı mövqe nümayiş etdirdiyi və katolikosun çıxışlarını müdafiə etdiyi üçün rəsmi İrəvan tərəfindən "vurulub".
Musavat.com xəbər verir ki, Ermənistan rəhbərliyi ölkənin Rusiya Federasiyasındakı fəxri konsullarından biri – Yekaterinburqda akkreditə olunmuş Narek Spartakyanla əməkdaşlığa son verib. Bu qərarın səbəbi onun rəsmi İrəvanın Azərbaycan və Türkiyə ilə sülh siyasətinə qarşı çıxan dini lider Katolikos Aram I-in fikirlərini açıq şəkildə müdafiə etməsi olub. Bu barədə Ermənistan və beynəlxalq media məlumat yayıb.
Erməni mənbələri bildirir ki, Narek Spartakyan öz sosial çıxışlarında və yerli icma tədbirlərində Ermənistanın “ənənəvi dəyərlərə və kilsənin sözünə sadiq qalmalı olduğunu” vurğulayaraq, Azərbaycanla aparılan sülh danışıqlarını tənqid edən Aram I-in mövqeyini bölüşdüyünü açıq şəkildə dilə gətirib. Onun bu mövqeyi Ermənistan hökumətinin diplomatik kursu ilə ziddiyyət təşkil etdiyindən, Xarici İşlər Nazirliyi Spartakyanı vəzifədən uzaqlaşdırmaq qərarına gəlib.
Bu hadisə Ermənistan daxilində getdikcə açıq savaşa çevrilən dövlət-kilsə qarşıdurmasının yeni epizodu kimi dəyərləndirilir. Xüsusilə də Azərbaycanın ərazi bütövlüyünü tanımağa, sərhədlərin delimitasiyasına və regionda sabit sülhə yönəlmiş danışıqlara qarşı erməni keşişlərinin etirazları fonunda bu gərginlik daha da aydın görünür.
Qeyd edək ki, Ermənistan katolikosları – istər Aram I, istərsə də II Qaregin – son aylarda hökuməti açıq şəkildə ittiham edərək, Azərbaycanla sülhün “erməni xalqının maraqlarına zidd olduğunu” bəyan edirlər. Bu mövqe Ermənistan daxilində separatizmin və revanşizmin yenidən alovlandırılması cəhdləri kimi dəyərləndirilir.
Azərbaycan baxımından isə Spartakyanın vəzifədən azad olunması Ermənistanın müəyyən dairələrinin destruktiv qüvvələrə qarşı təzyiq göstərməsi kimi qiymətləndirilə bilər. Rəsmi Bakı sülh sazişinin imzalanmasına ümid edir və bu istiqamətdə Ermənistanda daxili müqavimətin zəifləməsi vacib şərt kimi önə çıxır.
Yekaterinburqdakı konsulun vəzifədən uzaqlaşdırılması həm də Rusiya-Ermənistan münasibətlərindəki mürəkkəbliyi yenidən gündəmə gətirir. Ermənistanın Rusiya ərazisindəki fəxri nümayəndəsinin sülhə qarşı çıxması və katolikosla eyni mövqedə dayanması təsadüfi deyil. Müşahidəçilərə görə, bu, Kremlin müəyyən dairələrinin də Ermənistan daxilində sülh prosesini pozmağa yönəlik mesajı ola bilər.
Spartakyanın geri çağırılmasından sonra verdiyi açıqlamada “mədəni və ictimai fəaliyyətini davam etdirəcəyini” bildirməsi isə onun bu mübarizədən tam çəkilmədiyinə işarə edir.
Bu hadisə Ermənistanın daxilindəki siyasi və dini güc savaşının getdikcə daha da kəskinləşdiyini göstərir və eyni zamanda sülh prosesinə zərbə vurmaq istəyən revanşist qüvvələrin hələ də aktiv olduğunu sübut edir.
Musavat.com
XƏBƏR LENTİ
30 Iyul 2025
29 Iyul 2025
ŞƏRHLƏRŞƏRH YAZ