Onlayn ictimai-siyasi qəzet
Niderlandda parlament seçkiləri: Müxalifət lideri istefa verdi
Niderlandda parlament seçkiləri başa çatdıqdan sonra ölkənin ən böyük müxalifət bloku olan Yaşıl Sol və Leyborist Partiyasının lideri Frans Timmermans siyasi hərəkatın rəhbəri vəzifəsindən istefa verdiyini açıqlayıb.
Musavat.com xarici agentliklərə istinadən xəbər verir ki, exitpoll nəticələrinə görə, alyans parlamentdə beş yer itirərək 20 yer qazanıb: "Əlbəttə ki, nəticələrimizdən son dərəcə məyus oldum, çünki biz çox səylə kampaniya apardıq". O, blokun və şəxsən özünün "kifayət qədər vətəndaşı onları dəstəkləməyə inandıra bilmədiyini" qiymətləndirib: "Mən bunun üçün tam məsuliyyəti öz üzərimə götürürəm. Buna görə də alyans rəhbərliyini növbəti nəslə təhvil vermək istəyirəm".
29 oktyabrda Hollandiyada Baş Ştatların yeni İkinci Palatasının (parlamentin aşağı palatası) erkən seçkiləri keçirilib. Krallığın konstitusiyasına əsasən, səsvermə bir gün davam edib. Hollandiya mediasının məlumatına görə, təxminən 135.000 Hollandiya vətəndaşı xaricdə səs vermək üçün qeydiyyatdan keçib ki, bu da rekord rəqəmdir və 2023-cü ildə keçirilən əvvəlki parlament seçkilərindən 25 faiz qədər çoxdur.
İlk exit-polla görə, “Avropayönlü Demokratlar 66” hərəkatı seçkilərdə 27 yerlə liderlik edir, ardınca Geert Vildersin ifrat sağçı Azadlıq Partiyası (25 yer) və sağçı liberal Azadlıq və Demokratiya Xalq Partiyası (23 yer) gəlir. Səsvermənin rəsmi nəticələri mövcud təcrübəyə uyğun olaraq bu gün açıqlanacaq.
Hollandiya Parlamenti 150 üzvdən ibarətdir və hökumət qurmaq üçün 76 yerlik sadə səs çoxluğu tələb olunur. Lakin heç bir partiya bu nəticəni təkbaşına əldə etməyib, buna görə də bir əsrdən çoxdur ki, ölkə yalnız koalisiya hökumətləri tərəfindən idarə olunur.
Musavat.com
XƏBƏR LENTİ
30 Oktyabr 2025
ŞƏRHLƏRŞƏRH YAZ