Onlayn ictimai-siyasi qəzet
Azərbaycanın dostu olan nazirə hücum- SKANDAL
Ölkəmizdən qayıdan xanım Sadiqi hədəfə alındı - skandal olaya Bakıdan reaksiya
İranda böyük rezonans doğuran yeni siyasi qalmaqal baş verib. Hadisənin mərkəzində nəqliyyat və şəhərsalma naziri, prezident Məsud Pezeşkianın komandasındakı yeganə qadın nazir Fərzanə Sadiqi dayanır.
Modern.az-ın məlumatına görə, nazir ötən həftə Bakıda Azərbaycan, Rusiya və İran nümayəndələrinin iştirakı ilə keçirilən “Şimal-Cənub” beynəlxalq nəqliyyat dəhlizi ilə bağlı danışıqlarda iştirak edib.
Səfərdən sonra o, Tehrana təyyarə ilə deyil, avtomobillə dönmək qərarına gəlib. Təxminən altı saatlıq yol qət edərək Ərdəbil şəhərinə çatdıqdan sonra oradakı hava limanından paytaxta uçmaq istəsə də, təhlükəsizlik yoxlamasından keçməkdən imtina edib.
Hadisə şahidlərinin bildirdiyinə görə, nazirin hava limanı əməkdaşları ilə arasında mübahisə yaranıb. Sadiqi əsəblə “bu hava limanının qapılarını da bağladacağam” deyə hədə-qorxu gəlib və sonda təyyarə ilə uçmaqdan imtina edərək Tehrana avtomobillə yola düşüb.
Növbəti gün hökumətin qərarı ilə Ərdəbil hava limanının direktoru Məhəmməd Kəsəbi vəzifədən azad edilib. Rəsmi açıqlamada bu qərarın “idarəetmə qiymətləndirməsi nəticəsində” verildiyi bildirilsə də, ictimaiyyət və deputatlar bu hadisəni nazirin davranışı ilə əlaqələndirirlər.
İran mətbuatında, xüsusən “Hashmehri Online” portalında sərt tənqidlər səslənib: “Əgər nazirdə gizli sənədlər olubsa, niyə onlar qaydalara uyğun təqdim edilməyib? Əgər şəxsi əşyalar idisə, o zaman təhlükəsizlik əməkdaşlarını təhdid etmək nədən irəli gəlirdi?”
Məqalədə vurğulanır ki, təhlükəsizlik qaydaları istisnasız bütün sərnişinlərə, o cümlədən nazirlərə şamil olunur.
İranlı politoloq Əlirza Ərdəbili Haqqin.az-a açıqlamasında bildirib ki, hadisə sıradan insident deyil: “İranın aviasiya sistemində belə hadisələrin ictimailəşməsi indiyədək görünməmiş haldır. Lakin burada əsas məsələ qadın nazirin şəxsiyyətidir. Mühafizəkar dairələr onun varlığından narahatdır.”
Ərdəbilinin fikrincə, bu insident vasitəsilə Pezeşkian hökumətindəki islahatçı qanada qarşı hücum başladılıb:
“Radikal dindar qüvvələr qadının nazir postunda olmasını qəbul edə bilmir. Hadisəni şişirdərək, onun istefasını tələb etməyə başladılar.”
Qeyd olunur ki, Fərzanə Sadiqinin Bakıya səfəri zamanı “Şimal-Cənub” dəhlizinin sürətləndirilməsi barədə razılıq əldə olunmuşdu. Bu layihə Tehranın illik 40 milyon ton tranzit yük və milyardlarla dollar gəlir gözlədiyi strateji istiqamətdir. Buna görə də hökumət çevrələri hesab edir ki, qalmaqal uğurlu səfəri kölgəyə salmaq məqsədi daşıyır.
Nazirin çantasında nə olduğu hələ də bəlli deyil. Bəzi versiyalara görə, orada mühüm sənədlər, bəzilərinə görə isə şəxsi əşyalar olub. Lakin ekspertlər qeyd edir ki, məsələ artıq təkcə “çanta qalmaqalı” deyil, İranda qadınların və islahatçıların hökumətdəki rolu uğrunda mübarizənin yeni mərhələsidir.
Fərzanə Sadiqinin istefa ehtimalı isə az qiymətləndirilir: çünki onun təyinatı Ali Rəhbər Əli Xameneinin fərmanı ilə təsdiqlənib və bu qərarın açıq şəkildə şübhə altına alınması Tehran siyasətində “qırmızı xətt” sayılır.
Oqtay Qasımov
Politoloq Oqtay Qasımov “Yeni Müsavat”a bildirdi ki, xanım nazirə qarşı İran mühafizəkar dairələrinin hücumlarının genişlənəcəyi gözlənilən idi: “Bu hücumlar bir neçə səbəbdən baş verir. Birincisi, mühafizəkar qanadı təmsil edən şəxslər ümumiyyətlə, qadın hüquqları mövzusunda prezident Məsud Pezeşekianla eyni mövqedən çıxış etmir. Onlar qadınların dövlət qurumlarında işləməsinə, yüksək vəzifədə təmsil olunmasına qarşıdırlar. Prezident Pezeşkian isə qadınların bu hüquqlarının təmin olunmasını tərəfdarıdır. Mühafizəkar öz mövqelərini açıq şəkildə ifadə etməsələr də dolayısı yollarla göstərirlər. Hesab edirəm ki, xanım nazirin hədəfə alınmasının ikinci səbəbi onun məhz Azərbaycanla, xüsusilə Zəngəzur dəhlizi ilə bağlı məsələlərdə tutduğu mövqedir”.
O.Qasımovun sözlərinə görə, xanım nazir həm Azərbaycanla əlaqələrin inkişaf etdirilməsində tərəfdar olan şəxslərdəndir və özü də buna çalışır, o, islahatçı komandada kifayət qədər nüfuzlu fiqur sayılır, həm də İranda tək və islahatçı xanım nazir kimi İran qadınları tərəfindən xüsusi dəstəklənir: “Eyni zamanda, Zəngəzur dəhlizinin açılması məsələsinə onun yanaşması İranın mürtəce mühafizəkar dairələrinin yanaşmalarından fərqlidir. O bu dəhlizin açılmasının İranın maraqlarına zidd olmayacağı qənaətindədir və bunu açıq şəkildə ifadə edir. Bütün bunlara görə də İranda Sadiqiyə qarşı aparılan kampaniya təkcə onun özünə qarşı deyil, eyni zamanda, Pezeşkian əleyhinə hücum kampaniyasıdır. Bu kampaniya İran-Azərbaycan münasibətlərini pozmağa hesablanmış kampaniyadır. Prezident Pezeşkianın və onun islahatçı komandasının Azərbaycanla münasibətlərdə, Qərblə münasibətlərdə fərqli, konstruktiv mövqe tutması onları mühafizəkar dairələrin hədəfinə gətirib. O baxımdan xanım nazirə qarşı hücum həm də dolayısı ilə Pezeşkiana edilən təzyiq kimi dəyərləndirilməlidir”.
Etibar SEYİDAĞA,
“Yeni Müsavat”
XƏBƏR LENTİ
25 Oktyabr 2025
ŞƏRHLƏRŞƏRH YAZ