Onlayn ictimai-siyasi qəzet
Azərbaycanın NATO ilə treninqi kimlərin yuxusunu qaçırdı?
İnternetin Rusiya seqmentində əcaib reaksiyalar
Azərbaycan Müdafiə Nazirliyi və NATO arasında 2025-ci il üçün “Fərdi Tərəfdaşlıq üzrə Əməkdaşlıq Proqramı”na əsasən, Niderland Krallığının Brunssum şəhərində yerləşən Müştərək Qüvvələr Komandanlığının Mobil Təlim Qrupu ilə “Əməliyyatların planlama prosesi” mövzusunda treninq keçirilir.
Bu barədə Müdafiə Nazirliyindən məlumat verilib.
Bildirilib ki, Milli Müdafiə Universitetinin Hərb Oyunları Mərkəzində keçirilən treninqdə NATO-da əməliyyat planlama və idarəetmə, eləcə də digər mövzularda nəzəri və praktiki məşğələlər təşkil olunur.
“Bakı NATO-ya stavka etdiyini gizlətmir. Artıq söhbət formal əməkdaşlıqdan yox, blokun strukturlarına faktiki inteqrasiyadan gedir. Azərbaycan alyansın qüvvələri ilə əməliyyat planlaşdırır”.
İnternetin Rusiya seqmentində anti-Azərbaycan resurslarının birində məşğələlərə belə reaksiya verilib. Bu cür qərəzli mövqelərdə sanki belə rəy yaradılır ki, guya Bakı ilə NATO Moskva ilə münasibətlərdə yaranmış gərginlikdən sonra əməkdaşlığa başlayıblar. Bəllidir ki, Azərbaycanla NATO arasında çoxillik əməkdaşlıq çərçivəsində həm nəzəri, həm də praktiki olaraq kifayət qədər tədbirlər keçirilir ki, onların təşkili üçün suveren dövlət kimi Azərbaycan üçüncü tərəfdən razılıq almağa borclu deyil. Bundan əlavə, Azərbaycan hərbi bloklardan kənarda qalmaq statusuna sadiqdir və bu qəbildən olan ittihamlar gülünc görünür. Azərbaycan hakimiyyəti balanslaşdırılmış xarici siyasətin amillərindən biri kimi 1994-cü ildə “Sülh naminə tərəfdaşlıq” sənədini imzalamaqla NATO ilə qarşılıqlı əməkdaşlığa başlayıb. Azərbaycan-NATO tərəfdaşlığının əsas istiqamətləri siyasi dialoq, sülhməramlı əməliyyatlar, terrorizmlə mübarizə, təhlükəsizliyin təmin edilməsi və müdafiəyə xüsusi önəm verilməklə praktiki əməkdaşlıqdır. Bütün bu məqamlar Azərbaycan tərəfindən 30 il əvvəl bəyan edilib və heç vaxt məxfilik təşkil etməyib. Görünür, Rusiyadakı bəzi dairələr Azərbaycana qarşı kin-küdurətini büruzə vermək üçün hər bir fütsətdən istifadə edir.
Vaxtilə NATO Parlament Assambleyasında Azərbaycan nümayəndə heyətinin üzvü olan, Demokratik Maarifçilik Partiyasının sədri, Milli Məclisin deputatı Elşən Musayev “Yeni Müsavat”a açıqlamasında Azərbaycanın daim hər kəsə qarşı düzgün siyasət yeritdiyini bildirdi: “Əlbəttə ki, Azərbaycanın istənilən uğurlu və müstəqil addımı müəyyən dairələrdə dərhal paxıllıq, qısqanclıq hissini alovlandırır və belə olan halda kimin ağlında özünə sərf edən, özünün ağlı kəsdiyi nə versiya varsa, anındaca irəli sürür. Hərgah, reallıq tam başqadır, gözlə görünən qədər şəffafdır və qayə etibarilə də ondan ibarətdir ki, Azərbaycanın NATO ilə əməkdaşlığı uzun illərə söykənən bir prosesdir və həmin əməkdaşlıq özündə heç bir zaman separat niyyətləri, kiməsə acıq vermək arzusunu, demarş kursunu ehtiva etməyib. Əksinə, bizim strategiyamız yetərincə aydındır, izahlıdır və əsaslandırılmışdır. Yəni, Azərbaycan kiminlə əməkdaşlıq edirsə, bunu daim kişiyanə edir, açıq edir, rəsmi dövlət siyasətinin platforması səviyyəsində edir və buna görə də Rusiyadakı bəlli - qərəzli seqmentin Azərbaycan - NATO münasibətlərində hansısa qara məqsədlər axtarması, mövzunu kontekstdən çıxarma cəhdləri tamamən absurd və yolverilməzdir. NATO məgər yeni söhbətdir? Bizim NATO ilə əməkdaşlığımız məgər indi başlayıb? Yox, təbii. Bu təmaslar 1994-cü ildən, "Sülh naminə tərəfdaşlıq" sənədi imzalanandan bəri var və Azərbaycan tərəfi də hər zaman məlum əməkdaşlığa, münasibətlərə hörmətlə yanaşıb.
Ayrıca, biz hərbi bloklarla bağlı mövqeyimizi çoxdan müəyyənləşdirmişik və KTMT-yə, digər hərbiləşmiş təşkilatlara deyil, məhz NATO-ya doğru istiqamətlənmişik. Ona görə də Azərbaycan Müdafiə Nazirliyinin NATO ilə bərabər müştərək treninq keçirməsində kimsə alt məqsədlər axtarmamalı, mövzunu başqa yerlərə doğru istiqamətləndirməməlidir. Bu, təbii, normal bir prosesdir və ortalıqda da heç bir gizlin məqsəd-filan yoxdur".
Cavanşir ABBASLI,
“Yeni Müsavat”
XƏBƏR LENTİ
07 Iyun 2025
06 Iyun 2025
ŞƏRHLƏRŞƏRH YAZ