Onlayn ictimai-siyasi qəzet
BMT dünya üzrə sülhməramlıların sayını AZALDIR
Birləşmiş Millətlər Təşkilatı (BMT) yaxın aylarda dünya üzrə doqquz əməliyyatda sülhməramlılarının sayını təxminən 25% azaltmağı planlaşdırır.
Musavat.com xəbər verir ki, bu barədə “Reuters” agentliyi məlumat yayıb.
Qərarın əsas səbəbləri maliyyə çatışmazlığı və ABŞ-ın gələcək maliyyələşdirməsi ilə bağlı qeyri-müəyyənlikdir.
"Ümumiyyətlə, biz sülhməramlı qoşunlarımızın və polislərimizin, eləcə də onların avadanlığının təxminən dörddə birini azaltmalı olacağıq. Bu, çoxlu sayda mülki missiya personalına da təsir edəcək", - deyə BMT sözçüsü agentliyə bildirib.
Sözçü əlavə edib ki, plan üzrə bu, 13–14 min hərbçi və polis personalının azaldılmasına bərabər olacaq.
Təsirə məruz qalacaq əməliyyatlar arasında Cənubi Sudan, Konqo Demokratik Respublikası, Livan, Kosovo, Kipr, Mərkəzi Afrika Respublikası, Qərbi Sahara, İsrail və Suriya arasındakı Qolan təpələrindəki hərbsizləşdirilmiş zona, həmçinin Cənubi Sudan və Sudan tərəfindən birgə idarə olunan Abyei inzibati bölgəsi yer alır.
Nəşr vurğulayır ki, ABŞ BMT-nin sülhməramlı əməliyyatlarının ən böyük maliyyə dəstəkçisidir və ödənişlərin 26%-dən çoxunu təşkil edir. İkinci yerdə Çin gəlir və bu, təxminən 24%-dir. Qeyd olunur ki, bu ödənişlər könüllü xarakter daşımır.
BMT rəsmiləri həmçinin bildiriblər ki, iyulun 1-də yeni maliyyə ilinin əvvəlində ABŞ-ın BMT-yə borcu 1,5 milyard dollar təşkil edib. Hazırda Vaşinqtonun əlavə 1,3 milyard dollar borcu var və ümumi borc 2,8 milyard dolları ötüb. Eyni zamanda, ABŞ rəsmiləri BMT-yə 680 milyon dollar borcu tezliklə ödəyəcəklərini açıqlayıb.
Qeyd edək ki, avqust ayında ABŞ prezidenti Donald Tramp 2024 və 2025-ci illər üçün sülhməramlı əməliyyatlara ayrılmış təqribən 800 milyon dollar vəsaiti birtərəfli qaydada ləğv edib.
Baş Assambleyada çıxışı zamanı Tramp BMT-ni tədbirləri pis təşkil etməkdə günahlandırıb. O, təşkilatın böyük potensialının istifadə edilmədiyini, mövcudluğunun isə sual altında olduğunu iddia edib. Tramp bildirib ki, BMT-nin fəaliyyəti əsasən sərt məktublar yazmaqdan ibarətdir və bunun ardınca əməli addımlar atılmır. Onun sözlərinə görə, bu cür "boş sözlər" müharibələri dayandıra bilmir.
Musavat.com
XƏBƏR LENTİ
09 Oktyabr 2025
ŞƏRHLƏRŞƏRH YAZ