Onlayn ictimai-siyasi qəzet
İsrailin hücumunda öldürülən fələstinli jurnalistin öncədən yazdığı vəsiyyət – “Əgər bu sözlər sizə çatıbsa, demək, məni öldürüblər”
Musavat.com xəbər verir ki, İsrail ordusunun Qəzzada “Əl-Şifa” xəstəxanası yaxınlığında jurnalist çadırını bombalaması nəticəsində həlak olan “Al Jazeera” müxbiri Anas Camal aş-Şərifin illər boyu gördüyü işlər kimi, ölümü də bütün dünyada rezonans doğurub.
Onun aprel ayında yazdığı və öz ölüm ehtimalı üçün hazırladığı vəsiyyətnaməsi ölümündən sonra yayılıb və dərin emosional təsir yaradıb.
Vəsiyyətnaməsində Anas aş-Şərif sözlərinə belə başlayır:
“Bu mənim vəsiyyətnaməm və son mesajımdır. Əgər bu sözlər sizə çatıbsa, demək, İsrail məni öldürə bilib və səsimi susdurub. Allah bilir ki, mən bütün gücümü xalqımın dayağı və səsi olmaq üçün verdim — həyat gözlərimi açdığım andan etibarən, Cəbilə qaçqın düşərgəsinin küçələrində.”
O, ömrünün əsas arzusunun ailəsi ilə birlikdə işğal altında olan doğma Əskəlona (Məcdal) dönmək olduğunu qeyd edib, lakin “Allahın iradəsi öz yerini tapdı” deyə yazıb. Həyatı boyunca ağrı, itki və kədərin bütün formalarını yaşadığını, amma bir gün belə həqiqəti təhrif etmədən danışmaqdan imtina etmədiyini vurğulayıb.
Anas, vəsiyyətnaməsində Fələstin xalqını və torpağını bütün dünya azad insanlarına əmanət etdiyini bildirib:
“Mən sizə Fələstini — müsəlmanların incisini, yer üzündəki hər azad insanın ürəyini etibar edirəm… Mən sizdən xahiş edirəm — zəncirlərin sizi susdurmasına imkan verməyin, sərhədlərin sizi saxlamasına yol verməyin. Torpağın və onun xalqının azadlığına körpü olun, ta ki oğurlanmış Vətənimizdə şərəf və azadlıq günəşi doğana qədər.”
Jurnalist, xüsusilə ailəsinə ünvanladığı hissəli və dərin mesajlarla diqqət çəkib: qızı Şamı böyüyə bilmədən itirdiyini, oğlu Salihin yanında olub ona dəstək verə bilmədiyini, anasının dualarının ona həyat boyu möhkəmlik verdiyini, həyat yoldaşı Umm Salihin müharibə dövründə zeytun ağacı kimi möhkəm qaldığını yazıb.
O, oxuculardan ailəsinə Allahdan sonra dayaq olmalarını xahiş edib:
“Əgər mən ölürəmsə — prinsiplərimdən dönmədən, Onun qərarından razı, Onunla görüşə hazır olaraq ölürəm, bilə-bilə ki, Allahda ən yaxşı və əbədi olan var. Ey Allah, məni şəhidlər sırasına qəbul et, günahlarımı bağışla və qanımı xalqım və ailəm üçün azadlıq yolunda nur et.”
Anas aş-Şərif son sözlərində insanlardan onu və Fələstini unutmamalarını, dualarında xatırlamalarını istəyib:
“Qazanı unutmayın… Və məni bağışlanma və mərhəmət dualarınızda unutmayın.”
Aprelin 6-da yazdığı bu vəsiyyət, avqustun 10-da İsrail ordusunun hücumunda həyatını itirməsindən sonra yayıldı və qısa müddətdə bütün dünyada paylaşıldı. Onun səsi, sağlığında olduğu kimi, ölümündən sonra da fələstinlilərin azadlıq və ədalət mübarizəsinin simvollarından birinə çevrildi.
MUSAVAT.COM
XƏBƏR LENTİ
15 Avqust 2025
ŞƏRHLƏRŞƏRH YAZ