Onlayn ictimai-siyasi qəzet
Müharibə iştirakçısı medalı alan müğənni qazidən şikayətçi oldu- QALMAQAL BÖYÜDÜ
Müğənni Nigar Rəhimova qazi Bəxtiyar Məmmədlidən şikayətçi olub.
Musavat.com xəbər verir ki, buna səbəb Bəxtiyar Məmmədlinin sosial şəbəkədə müğənninin “Vətən Müharibəsi iştirakçısı” medalı ilə təltif edilməsi ilə bağlı paylaşımı olub.
Nigar Rəhimova özünün instaqram səhifəsində “Vətən Müharibəsi iştirakçısı” medalı ilə təltif edilməsi ilə bağlı paylaşım edib. Vəsiqənin şəklini də izləyicilərinə nümayiş etdirib.
Bundan sonra Bəxtiyar Məmmədli müğənninin medal alması ilə bağlı sosial şəbəkədə (TikTok) paylaşım edib və bu məlumat geniş şəkildə yayılıb. İctimai maraq doğuran bu məsələ geniş müzakirələrə səbəb olub və əksər sosial şəbəkə istifadəçiləri müğənninin hansı xidmətinə görə bu medalla təltif edilməsini sorğulamağa başlayıb. Tənqidi fikirlər səsləndirənlərlə yanaşı müğənninin ünvanına təhqiredici ifadələr işlədən xeyli sayda sosial şəbəkə istifadəçiləri də olub. Onlar müharibə işçtirakçılarının bir çoxuna medal verilmədiyi halda müğənniyə medal verilməsini etirazla qarşılayıblar.
Bu şərhlərdən və tənqidlərdən narazı qalan müğənni Bəxtiyar Məmmədlini məhkəməyə verib. Qazidən şikayətçi olmasının səbəbi isə bu xəbərin onun paylaşımından sonra geniş rezonans doğurması olub.
Müğənni qazinin xüsusi ittiham qaydasında cəzalandırılmasını istəyir. N.Rəhimova həmin paylaşımdan sonra ünvanına təhqirlər səsləndirildiyini, şərəf və ləyaqətinin alçaldıldığını bildirir.
Bildirək ki, müğənninin medal almasının səbəbi onun 44 günlük müharibə zamanı Müdafiə Nazirliyinin H.Aslanov adına Ordu İdeoloji Mərkəzinin mahnı və rəqs ansamblında çalışması olub. Məlumata görə o, ansambl üzvü olaraq hərbçilərin mənəvi-psixoloji vəziyyətinə dəstək olmaq üçün çıxışlar edib, onların mənəvi-psixoloji təminatına dəstək olub.
İ.Muradov
Musavat.com
XƏBƏR LENTİ
21 May 2025
ŞƏRHLƏRŞƏRH YAZ