Onlayn ictimai-siyasi qəzet
Nazirliyin mütəxəssisi Nizami Alışanın məhkəməsinə çağırıldı
Bakı Ağır Cinayətlər Məhkəməsində hakim Aytən Əliyevanın sədrliyi ilə Nizami Alışanın cinayət işi üzrə növbəti məhkəmə prosesi keçirilib.
Musavat.com xəbər verir ki, prosesdə keçmiş Rabitə Nazirliyindən mütəxəssis çağırılması ilə bağlı qərar qəbul edilib.
Qeyd olunub ki, bəzi halların araşdırılması üçün müvafiq texniki biliklərə malik şəxsin iştirakı zəruridir.
İttiham aktına əsasən, Nizami Alışan investisiya fəaliyyəti ilə məşğul olan platformada “İnvest.az” vasitəsilə valyuta alqı-satqısı adı altında vətəndaşlardan külli miqdarda vəsait alaraq, onları dələduzluq yolu ilə ələ keçirməkdə təqsirləndirilir.
Zərərçəkmiş Babək Məmmədzadənin təqdim etdiyi və səs yazısı olduğu bildirilən fləşkart sübut kimi qəbul edilməsə də, istintaq materialları sırasına daxil edilib. Məhkəmə həmin sübuta yalnız zərərçəkmişin iştirakı təmin edildikdən sonra hüquqi qiymət verəcəyini açıqlayıb.
Təqsirləndirilən şəxsin müdafiə tərəfi Samir İsayev əvvəlki iclaslardan birində şahidin “İnvest.az” platformasına köçürülən vəsaitlərin taleyinə dair suallara cavab olaraq bu məsələyə maliyyə şöbəsinin daha dəqiq cavab verə biləcəyini bildirdiyini xatırladıb. Bu səbəbdən, vəkil “İnvest.az”ın nümayəndəsi Ceyhun adlı şəxsin məhkəmədə dindirilməsi barədə vəsatət qaldırıb.
Vəsatət təmin edilməsə də, alternativ olaraq adıçəkilən şirkətin başqa nümayəndəsinin prosesdə iştirakı ilə bağlı qərar qəbul olunub.
Növbəti məhkəmə iclası iyulun 17-nə təxirə salınıb.
İttiham aktına əsasən, Nizami Alışan investisiya fəaliyyəti adı altında vətəndaşlardan külli miqdarda vəsait toplayaraq mənimsəməkdə təqsirləndirilir. O, özünü valyuta və səhm alqı-satqısı sahəsində peşəkar kimi təqdim edərək, yüksək gəlir vədi ilə üç nəfər zərərçəkmişin - Babək Məmmədzadə, Zeynal Usubov və Yadigar İsrafilovun etibarını qazanıb. Həmin şəxslərdən müvafiq olaraq 1 milyon 300 min, 945 min və 200 min ABŞ dolları məbləğində pul alınıb. Cəmi 2 milyon 445 min dolların təyinatı üzrə istifadə olunmadığı, şəxsi məqsədlərlə mənimsəndiyi iddia olunur.
Toplanan sübutlar əsasında Nizami Alışana qarşı Azərbaycan Respublikası Cinayət Məcəlləsinin 178.4-cü maddəsi ilə (xüsusilə külli miqdarda ziyan vurmaqla törədilən dələduzluq) ittihamı irəli sürülüb.
Təqsirləndirilən şəxsin ictimai statusu və ailə əlaqələri də işin diqqətçəkən məqamlarındandır. Belə ki, Nizami Alışan AzTV-nin keçmiş sədri Arif Alışanovun qardaşı oğludur. O, eyni zamanda ABŞ-da yaşayan tanınmış müğənni Elariz Məmmədoğlunun kürəkənidir.
Zərərçəkmiş Babək Məmmədzadə isə “Aztelecom” MMC-nin keçmiş rəhbəri Məhəmməd Məmmədovun oğludur.
İnarə Hünbət,
Musavat.com
ƏLAQƏLİ XƏBƏRLƏR
XƏBƏR LENTİ
15 Iyul 2025
ŞƏRHLƏRŞƏRH YAZ