Onlayn ictimai-siyasi qəzet
Tramp–Zelenski danışığına Avropanın nəhəngləri də qoşulub – Qərbin diplomatik bloku formalaşır
Musavat.com xəbər verir ki, ABŞ prezidenti Donald Tramp ilə Ukrayna prezidenti Volodimir Zelenski arasında baş tutan telefon danışığı gözləniləndən daha geniş tərkibdə keçirilib.
Frans Press agentliyi ukraynalı mənbəyə istinadla bildirir ki, söhbətə bir neçə əsas Qərb lideri də qoşulub. Telefon zəngi zamanı NATO baş katibi Mark Rutte, Böyük Britaniyanın baş naziri Kir Starmer, Almaniya kansleri Fridrix Mers və Finlandiya prezidenti Aleksandr Stubb da iştirak ediblər.
Bu faktlar danışığın sıradan diplomatik əlaqə olmadığını, əksinə, Qərbin vahid strategiya ətrafında koordinasiyasının bir nümunəsi olduğunu göstərir. Danışığın əsas mövzusu Trampın növbəti planlaşdırılan diplomatik təşəbbüsü – Vladimir Putin və Zelenski ilə birbaşa, vasitəçisiz görüşünün təşkilinə hazırlıq məsələləri olub.
Ekspertlər qeyd edirlər ki, Trampın hər iki liderlə görüşmək niyyəti bu zəng vasitəsilə beynəlxalq legitimlik və dəstək qazandı. NATO və Avropa İttifaqının əsas liderlərinin iştirak etməsi bu təşəbbüsün artıq regional deyil, qlobal əhəmiyyət daşıdığını sübut edir.
Siyasi müşahidəçilərə görə, bu danışıq həm də Avropa liderlərinin Tramp administrasiyasının diplomatik xəttini dəstəkləməyə meylli olduqlarının əlamətidir. İstisna deyil ki, Putinlə görüşdən əvvəl bu liderlərin birgə koordinasiya etdiyi strateji xətt ortaya çıxacaq.
Qeyd edək ki, yaxın günlərdə Trampın həm Putin, həm də Zelenski ilə birbaşa görüşü gözlənilir. Bu görüşlərin təşkili prosesində bu günkü telefon danışıqları həlledici mərhələ sayılır.
Musavat.com
ƏLAQƏLİ XƏBƏRLƏR
XƏBƏR LENTİ
07 Avqust 2025
ŞƏRHLƏRŞƏRH YAZ