Onlayn ictimai-siyasi qəzet
Fələstin tanınır, İsrail qəzəblənir: sərt cavab regionu alovlandıra bilər
BMT-də Fələstin dövlətçiliyinin tanınması dalğasından sonra Avropa İttifaqının saytında Fransa və Böyük Britaniyanın Qüdsdəki səfirliklərinin ünvanları “İsrail”dən “Fələstin”ə dəyişdirilib. İsrailin baş naziri Benyamin Netanyahu bunu “HƏMAS üçün qələbə” adlandıraraq ABŞ-dan qayıtdıqdan sonra cavab tədbirləri görüləcəyini bəyan edib.
ABŞ mediasının yazdığına görə, Donald Tramp İsrailin Fələstini ilhaq etməsinə icazə verməyəcəyini bildirib.
Musavat.com xəbər verir ki, İsrailin mümkün cavab addımları barədə israilli hərbi jurnalist Sergey Auslender danışıb.
“Tam ilhaq
İsrailin suverenliyini bütün İudeya və Samariyaya yayması ciddi nəticələr doğura bilər. O cümlədən, “İbrahim sazişləri”nin denonsasiyası gündəmə gələ bilər.
“Birləşmiş Ərəb Əmirlikləri bu sazişlərdən çıxa bilər. Bu, İsrail üçün pisdirmi? Bəli. Çünki hər zaman sazişə sahib olmaq ondan məhrum olmaqdan yaxşıdır. Bu addım yeni tanınma dalğasına, sanksiyalara səbəb olacaq”.
Qismən ilhaq
Məsələn, İordan vadisində. Burada çoxlu israilli məskunlaşma var və təxminən 8–10 min fələstinli yaşayır. Onlara vətəndaşlıq verilə bilər.
“Amma bu, pis presedent yaradır. Əgər bütün İudeya və Samariyanı ilhaq edəcəksənsə, niyə yalnız bunlara vətəndaşlıq verilir, qalan 3 milyon nəfərə yox?”
Konsulluqların köçürülməsi tələbi
İsrail bu ölkələrin konsulluqlarının Fələstin Muxtariyyətinin ərazisinə köçürülməsini tələb edə bilər. Norveç artıq konsulluq fəaliyyətini Fələstinə şamil etdiyini açıqlayıb, amma Qüdsdən Ramallaha köçməyi qətiyyətlə rədd edib.
Diplomatların qovulması və sanksiyalar
Fələstini tanıyan ölkələrin rəsmilərinə qarşı sanksiyalar tətbiq edilə bilər.
“Amma bu asan deyil. O halda onlar da İsrail diplomatlarını ölkədən çıxaracaqlar. İki ispan qadın nazirə artıq sanksiya qoyulub, İsrailə girişləri qadağan edilib. Diplomatiyada hər zaman proporsionallıq prinsipi işləyir, buna görə də ciddi düşünmək lazımdır”.
Fələstin rəhbərliyinə qarşı sanksiyalar
Hazırda Fələstin lideri Mahmud Abbasın hərəkət azadlığının məhdudlaşdırılması müzakirə olunur. İndiyə qədər Fələstin rəhbərlərinin İudeya və Samariyanın bütün ərazisində sərbəst hərəkət etmək imkanı vardı.
“İsrailin cavabı nə qədər sərt olsa, reaksiyalar da bir o qədər sərt olacaq, bunun ardınca isə İsrailin növbəti cavabı daha sərt olacaq. Axırda bu, çox uzaqlara gedə bilər”, - deyə Auslender xəbərdarlıq edir.
Musavat.com
XƏBƏR LENTİ
26 Sentyabr 2025
ŞƏRHLƏRŞƏRH YAZ