Onlayn ictimai-siyasi qəzet
Şimali Kiprin yeni prezidenti KİMDİR? - DOSYE
Xəbər verdiyimiz kimi, Şimali Kipr Türk Respublikasında (ŞKTR) keçirilən prezident seçkilərində Cümhuriyyətçi Türk Partiyasının (CTP) sədri Tufan Erhürman qalib gəlib. Qeyri-rəsmi nəticələrə görə, Erhürman seçkilərdə səs çoxluğu ilə qələbə qazanaraq ölkənin yeni prezidenti olub.
Musavat.com yeni seçilmiş prezidentin dosyesini təqdim edir:
1970-ci ildə Lefkoşada anadan olan Tufan Erhürman hüquqşünas, akademik və təcrübəli siyasətçidir. O, Ankara Universitetinin Hüquq fakültəsini bitirib, konstitusiya hüququ üzrə magistr və doktor elmi dərəcəsi alıb. Peşə fəaliyyətinə universitet müəllimi kimi başlayan Erhürman uzun illər dövlət idarəçiliyi və hüquqi islahatlar sahəsində çalışıb.
Erhürman 2013-cü ildə parlamentə deputat seçilib, 2018–2019-cu illərdə isə Şimali Kipr Türk Respublikasının Baş naziri vəzifəsini icra edib. Onun baş nazirlik dövrü şəffaf idarəçilik, sosial islahatlar və Türkiyə ilə əməkdaşlığın möhkəmləndirilməsi istiqamətində addımlarla yadda qalıb.
Yeni prezident siyasi baxışlarına görə sosial-demokrat xətti təmsil edir. O, Kipr məsələsində iki icmalı federasiya modelini dəstəkləyir və Kipr türklərinin beynəlxalq səviyyədə tanınması üçün diplomatik səylərin artırılmasının vacibliyini vurğulayır.
Erhürman seçkidən sonra verdiyi ilk açıqlamada sülh, ədalət və demokratik dəyərlərin qorunacağını, Türkiyə ilə strateji əməkdaşlığın isə davam etdiriləcəyini bildirib:
“Biz Kipr türklərinin hüquq və ləyaqətini qoruyaraq, daha ədalətli və dinc gələcəyə doğru addımlayacağıq.”
Qeyd edək ki, Türkiyə prezidenti Rəcəb Tayyib Ərdoğan Tufan Erhürmanı qələbə münasibətilə təbrik edib və Ankaranın Şimali Kiprin suveren hüquq və maraqlarını qorumaqda davam edəcəyini vurğulayıb.
Musavat.com
XƏBƏR LENTİ
20 Oktyabr 2025
ŞƏRHLƏRŞƏRH YAZ