Onlayn ictimai-siyasi qəzet
Suriya və İsrail nazirləri Bakıda görüşəcək – AFP-nin diplomatik mənbələri təsdiqlədi
Suriya və İsrail rəsmiləri arasında yüksək səviyyəli görüş bu cümə axşamı Bakıda baş tutacaq. Bu barədə məlumatı Fransanın nüfuzlu AFP xəbər agentliyi diplomatik mənbələrə istinadla yayıb.
Musavat.com xəbər verir ki, mənbələr bildirir ki, görüşün əsas mövzusu Yaxın Şərqdə artan gərginlik fonunda qarşılıqlı təhlükəsizlik məsələlərinin və regional sabitliyin müzakirəsidir.
Görüşün təşkilinin təşəbbüskarlarından birinin Azərbaycan olduğu ehtimal edilir. Rəsmi Bakı hələlik məsələ ilə bağlı şərh verməyib, lakin Prezident İlham Əliyevin tərəflərlə son aylar apardığı intensiv diplomatik təmaslar, xüsusilə Suriyanın yeni rəhbərliyi ilə qurulan əlaqələr və İsraillə strateji tərəfdaşlıq bu görüşün Azərbaycanda keçirilməsini mümkün edən əsas amillərdən sayılır.
AFP agentliyinin diplomatik dairələrdən əldə etdiyi məlumata görə, görüşə Suriyanın xarici işlər naziri Əsəd əl-Şibani və İsrailin milli təhlükəsizlik müşaviri Tzachi Hanegbi qatılacaq. Hər iki tərəf bu görüşə “texniki danışıqlar formatında” baxsa da, əldə ediləcək nəticələr bölgədə yeni bir mərhələnin başlanğıcı ola bilər.
Azərbaycan bu tip diplomatik vasitəçiliklərlə son illər regional və qlobal aktorlar arasında neytral və etibarlı platforma kimi tanınmağa başlayıb. Təkcə son bir il ərzində Bakı Rusiya-Ukrayna münaqişəsində qeyri-rəsmi vasitəçi rolu, İsrail-Türkiyə enerji danışıqları, eləcə də İranla Qərb arasında pərdəarxası təmaslar üçün diplomatik məkan kimi gündəmə gəlib.
Bu görüşün də məhz Bakıda keçirilməsi Azərbaycanın artan diplomatik nüfuzunun və tərəflərin Azərbaycanı güvənli tərəf kimi qəbul etməsinin sübutudur.
Mümkün nəticələr
• İsrailin Suriyada mövcudluğu və hərbi əməliyyatları ilə bağlı danışıqlar
• Qolan yüksəklikləri ətrafında yeni razılaşma imkanları
• Əsirin mübadiləsi və ya humanitar yardım yollarının açılması
• ABŞ və Rusiya kimi böyük güclərin razılığı və maraqları
Bu görüş haqqında əlavə detalların önümüzdəki günlərdə açıqlanacağı gözlənilir.
Musavat.com
XƏBƏR LENTİ
31 Iyul 2025
ŞƏRHLƏRŞƏRH YAZ