Onlayn ictimai-siyasi qəzet
Azərbaycanda rus dilində tədris aparılan məktəblərə ehtiyac varmı?
Azərbaycanda 300-dən çox məktəbdə rus dilində tədris aparılır.
Bu məktəblərin bəzilərində tədris yalnız Rus dilində aparılır, bəzilərində isə ayrıca rus bölməsi fəaliyyət göstərir.
Bəzi vətəndaşlar hesab edirlər ki, artıq ölkə ərazisində bu tip məktəblərin fəaliyyət göstərməsinə ehtiyac yoxdur.
Məsələ ilə bağlı Oxu.Az-ın suallarını cavablayan təhsil məsələləri üzrə ekspert Elçin Murad vurğulayıb ki, ölkə ərazisində rus dilində tədris aparan məktəblərin sayı kifayət qədərdir, buna isə hər hansı zəruri ehtiyac yoxdur:
"Çünki ingilis dilinə baxdıqda rus dilinin işlənmə dairəsi artıq o qədər də geniş deyil. Rus dilində tədris aparılan məktəblərin olması ölkə üçün əlavə itkidir. Biz Dövlət İmtahan Mərkəzinin (DİM) keçirdiyi imtahanların nəticələrinə baxanda görürük ki, rus bölməsini bitirən şagirdlərə ehtiyac artıq azalır. Burada təhsil alan şəxslərin universitetlərə qəbulunda azalma müşahidə olunur. Ona görə də sözügedən məktəblərin sayının kəskin şəkildə azaldılmasına ehtiyac var".
Onun sözlərinə görə, Çin ilə artan əməkdaşlığa görə bu dilin öyrədilməsi daha effektivdir.
"Son yaşanan hadisələrin fonunda belə qənaətə gəlmək olar ki, artıq rusdilli xalqlarla əlaqələri yavaş-yavaş müəyyən çərçivəyə salmaq lazımdır. Artıq ölkəmizdə və ölkə xaricində rus dilinin inkişafı və işlənmə dairəsinə baxdıqda görürük ki, 90 faiz hallarda ingilis dilinə daha çox müraciət edilir. Buna görə də ölkəmizdə ingilisdilli məktəblərin sayını artırmaq birinci məsələ olmalıdır. İngilis dili ilə yanaşı Pekinlə artan əməkdaşlıq səbəbindən Çin dilinin öyrənilməsini də müəyyən həddə çatdırmaq lazımdır. Zənnimcə, yaxın gələcəkdə ölkədə Çin şirkətlərinin sayında artım müşahidə ediləcək, bununla əlaqədar olaraq da tərcümə və başqa sahələrdə Çin dilinə böyük ehtiyac yaranacaq. Ümumiyyətlə, Çinlə münasibətlərin qurulması, əməkdaşlığın artırılması üçün bu dil vacibdir".
Ekspert vurğulayıb ki, ölkənin maddi resursunu rus dilində tədris aparılan məktəblərə sərf etmək mənasızdır:
"Hər il bu məktəblərə illik müəyyən məbləğdə pul ayrılır. Pul ayrılması isə mənasız və absurd yanaşmadır. Ölkə üçün heç bir faydası olmadığını nəzərə alsaq, bu addım gərəksizdir. Məktəbləri tamamilə ləğv etməsək belə, mərhələli şəkildə bunu etmək lazımdır. Onun üçün də dünyada hansı dilin aktiv, eyni zamanda, ölməməyimiz üçün nə qədər önəmli olmasına baxmaq vacibdir. Bundan sonra Elm və Təhsil Nazirliyi məktəblərə həmin dillərin tədrisi ilə bağlı tapşırıqlar verməlidir".
XƏBƏR LENTİ
04 Iyul 2025
03 Iyul 2025
ŞƏRHLƏRŞƏRH YAZ