Onlayn ictimai-siyasi qəzet
“Beş medalla təltif olunmuşdu” – Hərbçi Vüsal Əliyevin ölümünün TƏFƏRRÜATI
Ötən gün vəfat edən hərbçi Vüsal Əliyev Vətən müharibəsində göstərdiyi qəhrəmanlıqlara görə 5 medalla təltif edilibmiş.
Bunu “Yeni Sabah”a açıqlamasında mərhumun atası Məhərrəm Əliyev deyib.
Onun sözlərinə görə, oğlu 44 günlük müharibədə axıra qədər döyüşüb: “Vüsal “Vətən uğrunda”, “Vətən müharibəsi iştirakçısı”,“Füzulinin azad olunmasına görə, “Xocavəndin azad edilməsinə görə” və “Şuşanın azad edilməsinə görə” medallarına layiq görülmüşdü. Şuşa döyüşlərində qəlpə yarası almışdı. 8-ci il idi ki, hərbidə işləyirdi. Hərbi rütbəsi çavuş idi. Hadisənin baş verdiyi günə qədər orduda müddətdən artıq həqiqi xidmət hərbi qulluqçusu kimi xidmətini davam edirdi”.
M.Əliyev bildirib ki, müharibədən sonra V.Əliyevin səhhətində problemlər yaranıb:
“Öz gücümə aparıb bir neçə dəfə müalicə etdirdim. Sonralar tez-tez təlimdə olduğu üçün müalicəni davam etdirə bilmədi. Hadisədən hardasa 10 gün qabaq yenə başında ağrıların olduğunu dedi. Tez-tez yuxudan dik atılırdı. Getdi hərbi qospitalda yoxlandı. Həkimlər dərman filan yazmışdılar ki, 10 gün sonra gələrsən yenidən baxarıq. O da heç qismət olmadı. Son vaxtlar əsəbi idi, yatmırdı. Deyirdi, boğuluram. Yuxusuna tez-tez döyüş yoldaşlarını görürdü. “N” saylı hərbi hissədə xüsusi təyinatlı olaraq xidmət edirdi. Çox sir verən adam deyildi”.
V.Əliyev orta təhsilli və evli idi. İki övladı yadigar qalıb.
Əldə etdiyimiz məlumata görə, 27 yaşlı V.Əliyev özünə qəsd edib.
XƏBƏR LENTİ
07 Oktyabr 2025
ŞƏRHLƏRŞƏRH YAZ