Onlayn ictimai-siyasi qəzet
Moskva azərbaycanlıların deportasiyasına 45 min rubl xərcləyir
Moskva vilayətində məhkəmə icraçıları azərbaycanlıların deportasiyası üçün bir nəfərlik təyyarə biletlərinə 40–45 min rubl (təxminən 750–850 manat) xərcləyirlər.
Musavat.com xəbər verir ki, bu məbləğ bəzi hallarda Kuba və Latın Amerikası ölkələrinə deportasiya xərcləri ilə müqayisə edilə bilər.
Rəsmi dövlət satınalmaları portalında yerləşdirilən məlumatlara əsasən, bu məbləğ hər bir deportasiya olunan şəxs üçün ayrıca hesablanır və bilet xərcləri, müşayiət xərcləri, həmçinin sənədləşmə prosesləri daxil olmaqla bir neçə maddəni əhatə edir.
Ekspertlər bildirirlər ki, Rusiya büdcəsindən bu məqsədlə ayrılan vəsaitin artması ölkədə miqrasiya nəzarətinin sərtləşdirilməsi ilə bağlıdır. Onların sözlərinə görə, son aylarda Rusiya miqrasiya xidmətləri və polis orqanları qeyri-qanuni miqrantlara qarşı daha sərt tədbirlər həyata keçirməyə başlayıb.
Miqrasiya üzrə ekspertlərin fikrincə, bu proses həm sosial, həm də siyasi amillərlə bağlıdır. Bir tərəfdən, Rusiya daxilində artan iqtisadi çətinliklər fonunda miqrantlara qarşı ictimai narazılıq yüksəlir, digər tərəfdən isə, hökumət sərt nəzarət tədbirləri ilə daxili auditoriyaya “nizam-intizamın gücləndirilməsi” mesajı verməyə çalışır.
Eyni zamanda, hüquq müdafiəçiləri qeyd edirlər ki, deportasiya prosedurlarında tez-tez vətəndaşların hüquqları pozulur, bəzi hallarda sənədləri tam qaydasında olan şəxslər də ölkədən çıxarılır. Bu hallar həm ictimai narazılıq, həm də beynəlxalq təşkilatların diqqətini cəlb edir.
Musavat.com
XƏBƏR LENTİ
15 Oktyabr 2025
ŞƏRHLƏRŞƏRH YAZ