Onlayn ictimai-siyasi qəzet
“Əlverişli biznes və investisiya mühiti yaradaq...” - Qüdrət Həsənquliyev
Deputat Qüdrət Həsənquliyev Milli Məclisin bu gün keçirilən plenar iclasında “Dövlət xidmətləri haqqında” qanun layihəsinin ikinci oxunuşda müzakirəsi zamanı çıxış edib.
Musavat.com xəbər verir ki, deputat öncə qanun layihəsi hazırladıqlarına görə layihənin müəlliflərinə öz təşəkkürünü bildirib:
“Amma ikinci oxunuşun tələblərinə uyğun olaraq 14-cü maddəyə münasibətimi bildirmək istəyirəm. 14-cü maddədə qeyd olunur ki, dövlət xidmətlərinin göstərilməsi üçün ödəniş və 14-də qeyd olunur ki, dövlət xidmətlərinin göstərilməsi zamanı qanunla müəyyən edilmiş hallarda və məbləğdə dövlət rüsumları (və ya xidmət haqları ödənişlər) tutularaq aidiyyəti üzrə köçürülür.
Hörmətli həmkarlar, bu məsələ ilə bağlı mən əvvəllər də danışmışam. Bu il “Konstitusiya İli”dir və hesab edirəm ki, biz 14-cü maddəni bu formada qəbul edəcəyiksə, bu, birbaşa Konstitusiyaya ziddir”.
Qüdrət Həsənquliyev daha sonra deyib:
“Ona görə ki, burada dövlət rüsumundan və xidmət haqlarından söhbət gedir. Mən vaxtilə də bu məsələyə toxunmuşdum ki, Azərbaycan Respublikasında “Dövlət rüsumu haqqında” qanun var və həmin qanunun birinci maddəsi dövlət rüsumunun anlayışı adlanır: “dövlət rüsumu dövlət orqanları və müvafiq icra hakimiyyəti orqanının yaratdığı qurumlar tərəfindən hakimiyyət səlahiyyətlərinin icrası zamanı göstərilən və hüquqi nəticələrin yaranmasına səbəb olan xidmətlərə və hüquqi hərəkətlərə görə sənədlərin tərtibi, qeydiyyatı, razılıqların verilməsi və s. ödənilən haqdır (ödənişdir). Heç bir hüquqi (müvafiq icra hakimiyyəti orqanının yaratdığı qurum istisna olmaqla) və ya fiziki şəxs dövlətin adından bu qanunun 1.1-ci maddəsinin birinci abzasında göstərilən hakimiyyət səlahiyyətlərini həyata keçirə bilməz.
1.2-ci maddədə isə deyilir:
“Azərbaycan Respublikası Konstitusiyasının 73-cü maddəsinin 2-ci hissəsinə uyğun olaraq dövlət orqanları və müvafiq icra hakimiyyəti orqanının yaratdığı qurumlar qanunla nəzərdə tutulmuş əsaslar olmadan və qanunda göstərilmiş həcmdən, əlavə vergilər və başqa dövlət ödənişlərini müəyyən edə bilməzlər. Bu qanunun 17.6-1-ci maddəsində nəzərdə tutulan hallar istisna olmaqla Azərbaycan Respublikasının digər normativ hüquqi aktlarında dövlət rüsumunun məbləğləri və ödənilməsi qaydası ilə bağlı müddəalar nəzərdə tutula bilməz”.
17.6-1-ci maddədə söhbət nədən gedir? Yəni xarici ölkələrin müvafiq orqanları tərəfindən Azərbaycan Respublikasının vətəndaşlarına münasibətdə çoxdəfəlik giriş vizalarının rəsmiləşdirilməsi üçün tutulan rüsumların məbləği və bu qanunla eyni hərəkətlərə görə müəyyən edilmiş məbləğdən fərqli olduqda dövlət rüsumunun dərəcəsi müvafiq icra hakimiyyəti orqanının qərarı ilə həmin ölkələrdə Azərbaycan Respublikasının vətəndaşlarına münasibətdə tutulan rüsumun səviyyəsində müəyyən olunur.
Hörmətli həmkarlar, mən bu qanunun maddələrini niyə oxudum? Ona görə ki, əslində, rüsum göstərilən xidmətlərə görə haqdır. Biz burada rüsumu ayrıca qeyd edirik və göstəririk ki, xidmətlərə görə əlavə haqq ödənilir. Əgər dövlət orqanı göstərdiyi xidmətə görə haqq alacaqsa, bu, artıq kommersiya təşkilatıdır. Biz onda gərək onu vergilərə cəlb edək.
Mən başa düşürəm, ölkəyə pul lazımdır. Bunun üçün lazımdır ki, mülkiyyətin toxunulmazlığını təmin etmək üçün qanunun aliliyini təmin edək. Əlverişli biznes və investisiya mühiti yaradaq ki, ölkə iqtisadiyyatı inkişaf etsin və büdcə gəlirləri artsın, biz də dövlət orqanlarını büdcədən lazımi səviyədə maliyyələşdirə bilək. Amma bu formada vətəndaşlardan, fiziki və hüquqi şəxslərdən dövlət orqanının göstərdiyi rüsumdan əlavə bir xidmət haqqı alması da Konstitusiyaya ziddir. Hesab edirəm ki, biz buna, 4-cü maddəyə səs verməməliyik”.
Q.Həsənquliyev daha sonra deputat Ziyafət Əsgərovun etirazına da münasibət bildirib:
“Hörmətli Ziyafət müəllim yəqin ki, mənim çıxışıma diqqətlə qulaq asmadı. Mən qeyd etdim, “Dövlət rüsumu haqqında” qanunun 1-ci maddəsinin 1-2-ci bəndində qeyd olunur, Konstitusiyanın 73-cü maddəsinin 2-ci hissəsinə uyğun olaraq. Ziyafət müəllim, Konstitusiya qarşınızdadırsa, xahiş edirəm baxın”.
E.Paşasoy,
Musavat.com
XƏBƏR LENTİ
24 Oktyabr 2025
ŞƏRHLƏRŞƏRH YAZ