Onlayn ictimai-siyasi qəzet
Son günlər yayılan təxribat xarakterli məlumat və açıqlamalar…
Milli Məclisin iclasında çıxış edən deputat Ceyhun Məmmədov spikeri növbəti uğurlu səfər münasibətilə təbrik etməklə sözə başlayıb.
Musavat.com-un xəbərinə görə, o qeyd edib ki, Milli Məclis sədrinin Ermənistan parlamentinin rəhbəriylə görüşü Prezident İlham Əliyevin rəhbərliyi ilə həyata keçirilən sülh prosesinə mühüm töhfədir:
“Bu onu göstərir ki, sülh quruculuğu prosesində Azərbaycan parlamenti də fəal iştirak edir”.
Ceyhun Məmmədov ardınca Qubadlının azad olunması münasibətilə hər kəsi təbrik edib. Digər məqama diqqət çəkib:
“Son günlərdə yayılan bir sıra təxribat xarakterli məlumat və açıqlamalar bir daha göstərir ki, informasiya təhlükəsizliyi mövzusu təkcə mütəxəssislərin deyil, hər bir vətəndaşımızın diqqət mərkəzində olmalıdır. Bu gün informasiya dünyada sadəcə məlumat ötürmə vasitəsi deyil, ən güclü strateji silah kimi istifadə olunur. Bu mənada məlumatların kim tərəfindən, hansı məqsədlə və necə paylaşılması milli təhlükəsizliyimiz üçün həyati əhəmiyyət daşıyır.
Bu, bir danılmaz faktdır ki, yalan və ya təhrif edilmiş məlumatlar təkcə fərdlərin deyil, bütövlükdə cəmiyyətin zərərinə işləyə bilər. Bu gün informasiya müharibəsi adi silahlı qarşıdurmalardan daha gizli, lakin daha təhlükəlidir”.
Deputatın sözlərinə görə, bu gün təəssüf ki, sosial şəbəkələrdə və müxtəlif platformalarda məsuliyyətsiz paylaşımlar etmək, yoxlanılmamış xəbərlər yaymaq adi hala çevrilib:
“Bunu biz ən açıq şəkildə İkinci Qarabağ müharibəsi zamanı da gördük. Ölkəmizə qarşı hərbi əməliyyatlarla yanaşı, güclü informasiya müharibəsi də aparılırdı. O dövrdə bəzi saxta xəbərlər və yanlış paylaşımlar cəmiyyətin psixoloji durumuna təsir etmək, ordumuzun iradəsini zəiflətmək və xalqımız arasında çaşqınlıq yaratmaq məqsədi daşıyırdı. Lakin Prezident İlham Əliyevin qətiyyətli mövqeyi, dövlətimizin koordinasiyalı fəaliyyəti və doğru informasiya axınını təmin etməsi bu cəhdləri boşa çıxardı.
Bu gün də vəziyyət fərqli deyil. Regionda baş verən proseslər, qlobal güclərin maraqları, ölkəmizə qarşı təxribatçı kampaniyalar, deputat həmkarlarımız barəsində yayılan təhrif olunmuş məlumatlar bir daha göstərir ki, informasiya təhlükəsizliyi milli təhlükəsizliyin ayrılmaz hissəsidir.
Bu səbəbdən hər bir vətəndaşımız üzərinə düşən məsuliyyəti ciddi dərk etməli, paylaşdığı hər xəbərin mənbəyini yoxlamalı, yalnız rəsmi və etibarlı məlumatlara güvənməlidir.
Eyni zamanda təxribat xarakterli yazılara, saxta hesablardan yayılan məlumatlara alət olmamalı, özləri ilə yanaşı ətraflarındakı insanları da informasiyadan düzgün istifadəyə təşviq etməlidirlər.
Heç kim unutmamalıdır ki, informasiya silahı ya bizim gücümüzə güc qatır, ya da əleyhimizə çevrilir. Seçim bizim əlimizdədir. Hər bir vətəndaşımız diqqətli olmalı, dövlətimizin maraqlarını, xalqımızın təhlükəsizliyini qorumağı ən ümdə vəzifəsi bilməlidir. Heç kimin ölkəmizin informasiya məkanını çirkləndirməsinə, qələbəmizə xələl gətirməsinə icazə verilməməlidir”.
E.Paşasoy,
Musavat.com
XƏBƏR LENTİ
24 Oktyabr 2025
ŞƏRHLƏRŞƏRH YAZ