İranın xarici işlər naziri Abbas Əraqçi ABŞ-ın ölkənin nüvə infrastrukturlarına endirdiyi zərbələrin nəticələrinin çox ağır olduğunu açıqlayıb.

Musavat.com xəbər verir ki, onun sözlərinə görə, hücumlar İranın strateji nüvə obyektlərinə “geniş və ciddi” dərəcədə ziyan vurub.

“Deməliyəm ki, ziyan geniş və ciddi xarakter daşıyır. Amma Beynəlxalq Atom Enerjisi Agentliyinin (MAQATE) müfəttişlərinin obyektlərə səfər edib hərtərəfli məlumatlandırılması məsələsi parlamentin qəbul etdiyi qanunlara uyğun şəkildə həll olunmalıdır,” – deyə Abbas Əraqçi İranın dövlət xəbər kanalı IRINN-ə müsahibəsində bildirib.

Nazir həmçinin qeyd edib ki, bu məsələdə yekun qərarı İranın Ali milli təhlükəsizlik şurası verməlidir:
“Bu, strateji məsələdir və düşünürəm ki, qərar qəbul etmək hüququ yalnız Ali milli təhlükəsizlik şurasına məxsusdur".

Qeyd edək ki, Vaşinqton addımını regiondakı təhlükəsizlik təhdidləri ilə izah edib. Tehran isə bu hücumları beynəlxalq hüququn kobud şəkildə pozulması kimi qiymətləndirir.

Rəsmi mənbələr hücum nəticəsində nüvə obyektlərində baş verən dağıntıların miqyasını tam açıqlamasa da, ilkin məlumatlara görə, obyektlərin bərpası üçün uzunmüddətli və böyük həcmli resurslar tələb olunacaq.

İran rəsmiləri hücumla bağlı beynəlxalq təşkilatları və BMT Təhlükəsizlik Şurasını təcili reaksiya verməyə çağırıb.