Onlayn ictimai-siyasi qəzet
Tramp və Zelenski arasında gizli danışıqlar: Müharibənin sonu yaxınlaşır?
Musavat.com xəbər verir ki, ABŞ prezidenti Donald Tramp və Ukrayna prezidenti Volodimir Zelenski arasında telefon danışığı baş tutub. Bu barədə ilk olaraq nüfuzlu Axios nəşri məlumat yayıb və xəbəri Reuters də təsdiqləyib. Danışıqlar Rusiya-Ukrayna müharibəsinin ən kritik mərhələsində, Trampın Rusiya prezidenti Vladimir Putinə verdiyi sülh ultimatumunun başa çatmasına günlər qalmış reallaşıb.
Məlumatlara görə, Tramp Zelenskiyə Ukraynanın hava hücumlarından müdafiə sistemlərinin gücləndirilməsi istiqamətində dəstək vəd edib. O, ABŞ-ın bu sahədə yardım planının artıq formalaşmaqda olduğunu bildirib. Danışıqlarda həmçinin ABŞ və Ukrayna arasında pilotsuz uçuş aparatlarının (PUA) birgə istehsalı ilə bağlı təxminən 30 milyard dollarlıq layihə müzakirə olunub.
Axios-un yazdığına görə, Tramp Zelenskiyə açıq şəkildə bildirib ki, Rusiya ilə müharibənin tezliklə dayandırılması üçün diplomatik və iqtisadi təzyiqlər artırılacaq. Xüsusilə də, Putinə yönəlik 8 avqustadək verilmiş sülh ultimatumuna əməl olunmayacağı təqdirdə yeni sanksiyalar paketi tətbiq olunacaq.
Zelenski isə bu təkliflərə müsbət cavab verib və Ukraynanın ABŞ-la strateji əməkdaşlığı daha da dərinləşdirməyə hazır olduğunu bildirib. Prezidentlər arasında təxminən 40 dəqiqəlik telefon danışığında müharibədə son vəziyyət, Rusiyanın hava hücumları və tərəflərarası texnoloji əməkdaşlıq məsələləri geniş şəkildə müzakirə olunub.
Danışıqların fonunda Trampın nümayəndəsi, ABŞ-ın xüsusi elçisi Moskvada Putinin özü ilə görüşüb və bu səfərin də son şans xarakteri daşıdığı bildirilir.
Müşahidəçilər bu diplomatik aktivliyi ABŞ-ın Cənubi Qafqaz və Şərqi Avropa siyasətində yenidən dominant mövqe tutmaq niyyəti kimi dəyərləndirirlər. Eyni zamanda, bu proses Tramp administrasiyasının sülh təşəbbüslərini və Nobel Sülh Mükafatına iddiasını gücləndirən faktorlardan biri kimi qiymətləndirilir.
Artıq Rusiyaya qarşı yeni dalğa sanksiyalar gündəmdədir və bu danışıqlar yaxın günlərdə regionda vəziyyətin köklü dəyişikliklərə uğraya biləcəyinə işarə edir.
Musavat.com
XƏBƏR LENTİ
07 Avqust 2025
ŞƏRHLƏRŞƏRH YAZ