Onlayn ictimai-siyasi qəzet
Qan təhlükəsizliyində “qızıl standart”- NAT Texnologiyası artıq Azərbaycanda
“Donor qanının təhlükəsizliyinin təmin edilməsi, HİV, Hepatit B və C viruslarının erkən mərhələdə aşkarlanması üçün Səhiyyə Nazirliyi Respublika Qan Bankında NAT (Nuklein Turşusu Testi) texnologiyasının tətbiqinə başlanılıb”.
Musavat.com xəbər verir ki, bu fikirləri Səhiyyə Nazirliyinin rəsmi “Instagram” hesabında keçirilən canlı yayım zamanı Səhiyyə Nazirliyi Respublika Qan Bankının Donor qanı və onun komponentlərinin təhlükəsizliyinin təmin edilməsi şöbəsinin müdiri Növrəstə Hacılı açıqlayıb.
Onun sözlərinə görə, NAT infeksion agentlərin DNT və RNT molekullarını infeksiyanın erkən mərhələsində aşkarlayan real vaxt Polimeraz Zəncirvari Reaksiya (PZR) texnologiyası əsasında hazırlanıb:
“Pre-analitik və post-analitik həllərlə inteqrasiya olunub. Yüksək spesifiklik və həssaslıq – təkrar testə ehtiyacın azaldılması ilə donor itkilərinin minimuma endirilməsini təmin edir. Ümumilikdə isə NAT testi müasir transfuzion təbabətdə qan və onun komponentlərinin təhlükəsizliyini təmin edən ən yüksək səviyyəli diaqnostik metodlardan biridir. NAT-ın tətbiqinin əsas üstünlüklərindən biri pəncərə dövrünün qısaldılmasıdır. Donor qanının NAT ilə yoxlanılması sayəsində transfuziya ilə ötürülən infeksiyalara yoluxma riski böyük dərəcədə azalır. NAT texnologiyası ABŞ, Avropa İttifaqı və ÜST tərəfindən qan təhlükəsizliyi üçün “qızıl standart” kimi qəbul edilib. Dünyada qan banklarının əksəriyyətində ilk mərhələdə seroloji testlər aparılır, daha sonra isə NAT testi əlavə mərhələ kimi tətbiq olunur. Bu ikili yanaşma qan təhlükəsizliyinin təminatında optimal model kimi qəbul edilir. NAT testləri donorluqda riskləri aşkar etmək üçün seroloji testlərin nəticələrini tamamlayır və səhv mənfi halları istisna edir”.
N.Hacılı qeyd edib ki, Səhiyyə Nazirliyinin Respublika Qan Bankında NAT texnologiyasının tətbiqinə başlanılması Azərbaycanın transfuzion təbabətində dönüş nöqtəsi hesab edilir:
“Bu, yalnız transfuziya ilə ötürülən infeksiyaların qarşısını almağa deyil, həm də Azərbaycanın qan xidmətini beynəlxalq standartlara uyğunlaşdırmağa imkan verir. Seroloji və NAT testlərinin ardıcıl tətbiqi “ikiqat qoruma” prinsipi əsasında donor və resipientlərin təhlükəsizliyini ən yüksək səviyyədə təmin edir”.
ƏLAQƏLİ XƏBƏRLƏR
XƏBƏR LENTİ
15 Oktyabr 2025
ŞƏRHLƏRŞƏRH YAZ